Desemberspá Siggu Kling - Sporðdrekinn

Það er búið að vera svo margt að gerast, sumt hefur ekki verið alveg eins og þú vildir, en annað alveg frábært. Það hefur verið snúningur á lífi þínu og ef þú sérð eftir einhverju sem þú hefur hent frá þér eða sleppt, farðu þá til baka og náðu í það.

Hvort sem það tengist vinnu, annarri manneskju og svo framvegis, þá skaltu kalla á auðmýkt og þá finnurðu ánægjuna streyma til þín. Þú átt nefnilega eftir finna hvernig þú getur gert meira af því sem þú hefur gaman af og minna af því sem þér mislíkar.

Það verða miklar breytingar í kringum áttunda desember því þá er fullt tungl í Tvíburamerkinu og góður tími til að sleppa fram af sér beislinu og skemmta sér. Þú átt það nefnilega til að taka lífinu allt of alvarlega og gagnrýna þig eftir því.

Talan níu er sterk yfir Sporðdrekanum og táknar hún það að andlegi styrkur þinn eykst, meiri uppskera verður en þú bjóst við og lífið gefur þér ástæður til að fagna oftar. Mundu samt að það er mikilvægt að fagna. Því að þá sendirðu frá þér gleðistrauma sem breiðast út um allt því að orka eyðist ekki, það er vísindalega sannað.

Þó að þér finnist þú standir í myrkrinu þá er það bara þín eigin blekking og þú þarft bara eitt hænuskref til að standa í birtunni. Þú finnur líka uppruna þinn og veist að þú ert góður veiðimaður, svo þú verður að vita hvað þú vilt veiða og hvað þú vilt verða. Að lokum vil ég segja við þig að þú skalt standa á þínu og því sem þú vilt, því þá stendurðu með þér í ljósinu.

Ástin er að óska eftir þér, svo vertu viðbúinn því að gefa meira af þér og aðlaga þig að að þeirri persónu sem lætur þér líða vel.

Knús og kossar, Sigga Kling