Handbolti

Mark ársins: Varði boltann yfir allan völlinn og í mark mótherjanna

Óskar Ófeigur Jónsson skrifar
Gracia Axelsson sést hér með liðsfélögum sínum í liði Kärra HF.
Gracia Axelsson sést hér með liðsfélögum sínum í liði Kärra HF. Kärra HF

Markverðir í handbolta hafa komist mun oftar á markalistann á síðustu árum eftir að lið fóru að taka markvörðinn sinn úr markinu. Það þykir þó vera nánast einsdæmi markið sem sænski handboltamarkvörðurinn Gracia Axelsson skoraði á dögunum.

Gracia Axelsson var að spila með liði sínu Kärra HF á móti Skånela en leikurinn fór fram á heimavelli Skånela í úthverfi Stokkhólms.

Það á ekki að vera hægt að skora mark með fótunum í handbolta en Axelsson tókst það engu að síður í umræddum leik.

Leikmaður Skånela fór þá inn úr hægra horninu en Gracia gerði vel í að loka á hana og varði boltann með því að sparka út hægri fætinum.

Það vildi þannig til að hún sparkaði boltanum út úr teignum og upp völlinn. Útileikmenn Skånela misstu þar af honum og hann skoppaði alla leið yfir í markið hinum megin á vellinum.

Ótrúlegt mark og ekkert skrýtið að þau á Radiosporten tali um mark ársins. Það má sjá þetta sérstaka mark Graciu Axelsson hér fyrir neðan.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.