Innlent

Allir sjái að mikið sé undir

Tryggvi Páll Tryggvason skrifar
Halldór Benjamín Þorbergsson, framkvæmdastjóri SA.
Halldór Benjamín Þorbergsson, framkvæmdastjóri SA. Vísir/Vilhelm

Halldór Benjamín Þorbergsson, framkvæmdastjóri Samtaka atvinnulífsins, telur ljóst að allir sjái að mikið sé undir í kjaraviðræðum á almennum vinnumarkaði. Hann segir aðila vinnumarkaðarins ágætlega nestaða fyrir kjaraviðræður dagsins eftir óvæntan fund með forsætisráðherra í morgum.

Katrín boðaði Halldór Benjamín ásamt fulltrúum verkalýðshreyfingarinnar á fund sinn í dag. Þar var staðan í kjaraviðræðum á almennum vinnumarkaði til umræðu. Staðan í viðræðunum hefur verið metin þung eftir ákvörðun Seðlabankans í gær um að hækka stýrivexti, sem virðist hafa sett viðræðurnar í uppnám.

„Forsætisráðherra fór yfir stöðuna eins og hún blasir við ráðuneytinu. Svona opnaði á mögulegar aðgerðir sem ríkistjórnin gæti komið með til þess að liðka fyrir gerð kjarasamninga á almennum vinnumarkaði,“ sagði Halldór Benjamín að loknum fundi, aðspurður um hvað hafi þar komið fram.

Klippa: Jákvætt skref stigið í morgun

Hann segir að í gær hafi vatnaskil orðið í kjaraviðræðunum.

„Í gær urðu vatnaskil í þessum viðræðum. Samtök atvinnulífsins og verkalýðshreyfingin kaus að snúa bökum saman. Ég lít á þennan fund og þessa boðun hérna í morgun með þeim hætti að forsætisráðherra sé í raun bara að segja: Við stöndum með ykkur, við kjósum að þið reynið að leysa úr þessum vandamálum og reynið að landa skammtímakjarasamningi eins fljótt og auðið er,“ sagði Halldór Benjamín.

Markmið dagsins skýrt

Hann segir markmið dagsins að halda kjaraviðræðunum áfram, eftir ágætan fund með forsætisráðherra og öðrum aðilum vinnumarkaðarins í morgun, þar sem var að mati Halldórs Benjamín stigið jákvætt skref.

„Markmið dagsins er alveg skýrt og við komum ágætlega nestuð eftir þennan fund með forsætisráðherra. Markmiðið er að halda áfram að vinna að gerð kjarasamnings og koma þessum viðræðum aftur á þá teina sem þær voru komnar á áður en að peningastefnunefnd Seðlabankans tilkynnti um þessa misráðnu ákvörðun sína,“ sagði Halldór Benjamín.

Hann vildi þó ekki segja til um hvort að dagurinn í dag væri einhvers konar úrslitadagur í viðræðunum.

„Manni er kennt í grunnskóla að setja aldrei pressu á sjálfan sig að óþörfu. Ég held að það sjái það allir að hér er mikið undir en ég skynja ekki annað en að það sé vilji beggja vegna borðs að reyna að komast að niðurstöðu. Við skulum allavega sjá og spyrja okkur í dagslok hvernig það hefur gengið,“ sagði Halldór Benjamín.

Katrín Jakobsdóttir forsætisráðherra með þeim Ragnari Þór Ingólfssyni, formanni VR, VIlhjálmi Birgissyni, formaður Starfsgreinasambandsins, Kristjáni Þórði Snæbjarnarsyni, forseta ASÍ, og Halldóri Benjamín Þorbergssyni, framkvæmdastjóra SA, í Stjórnarráðshúsinu í morgun.Vísir/Vilhelm

Hann segir að mikil áhersla hafi verið lögð á skammtímasamning í viðræðunum hingað til og reiknaði Halldór Benjamín ekki með að breyting yrði á því í dag.

„Við erum svo sem ennþá með alla valmöguleika á borðinu en svona í ljósi þeirrar óvissu sem hefur komið. Í ljósi þeirrar verðbólgu og óvissu vegna ytri aðstæðna þá hefur já, verið mikil áhersla lögð á skammtímasamning og ég geri ráð fyrir því að við munum ræða það betur inn í daginn.“


Tengdar fréttir

„Við þurfum að­eins að vakna,“ segir fjár­mála­ráð­herra sem styður Seðla­bankann

Seðlabankastjóri svaraði fast fyrir þá gagnrýni sem hann hefur fengið frá aðilum vinnumarkaðarins vegna hækkunar vaxta á Peningamálafundi Viðskiptaráðs í morgun og sagði að það skipti ekki neinu „að lemja á“ Seðlabankanum fyrir að framfylgja lögbundnu hlutverki sínu. Fjármálaráðherra lýsti því yfir að hann styddi ákvörðun Seðlabankans. „Raunverulega vandamálið“ sagði hann vera vinnumarkaðinn og benti á að það væri enginn samhljómur í kröfugerð helstu stéttarfélaganna.

Í­trekaði að stjórn­völd væru reiðu­búin að greiða fyrir gerð kjara­samninga

Katrín Jakobsdóttir forsætisráðherra segir að hún hafi með fundi sínum með fulltrúm verkalýðshreyfingarinnar og atvinnulífsins viljað ítreka það sem áður hafði komið fram. Að stjórnvöld séu reiðubúin til að leggja sitt að mörkum til greiða fyrir gerð kjarasamninga, ef þess er einhver kostur að þeir náist.

Staðan í kjara­við­ræðum brot­hætt

Kristján Þórður Snæbjarnarson, forseti Alþýðusambands Íslands, segir stöðuna í kjaraviðræðum brothætta þessa stundina og að stýrivaxtahækkun Seðlabankans í gær hafi sent kolröng skilaboð inn í þær. Hann fagnar að vilji sé hjá ríkisstjórn að koma inn í málin ef þurfa þykir.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.