Samtökin Tilvera, sem eru samtök um ófrjósemi, gerðu nýlega könnun meðal félagsmanna um kostnað fólks vegna ófrjósemismeðferða. Þar kom í ljós að kostnaður margra hleypur á milljónum króna.
„Alveg upp í fimmtán tuttugu milljónir. Við hjónin höfum lagt út sirka sjö milljónir en við náttúrulega höfum líka fengið styrk frá fjölskyldunni. Það náttúrulega tók langan tíma líka fyrir okkur að safna. Þannig að þó að við séum það lánsöm að eiga í dag þrjá syni þá tók alveg tíma alltaf á milli meðferða að safna. Þannig að við náðum ekki að kaupa okkur íbúð til dæmis fyrr en seint. Við erum nýbúin að ná að safna upp í afborgun af henni. Þannig að maður hefur þurft að setja svolítið til hliðar hluti kannski sem er öðrum sjálfsagðir,“ segir María Rut Baldursdóttir en hún situr í stjórn Tilveru.
Margvíslegur kostnaður falli til þegar fólk glímir við ófrjósemi ekki aðeins vegna meðferða, heldur einnig ferðakostnaður, sprautur og lyf og auka aðgerðir. Þá sé nokkuð um að fólk fari til útlanda í meðferðir sem kosti sitt. Mikilvægt sé að ríkið taki aukinn þátt í þessum kostnaði. Þrátt fyrir að niðurgreiðsla frá ríkinu vegna meðferða hafi aukist þá séu allt of fáar meðferðir niðurgreiddar.
„Nú er önnur, þriðja og fjórða meðferð vel niðurgreidd en það eru bara margir sem þurfa tíu til fimmtán meðferðir og það er ekkert eftir fjórðu meðferð, það er ekkert meira niðurgreitt,“ segir Sigríður Auðunsdóttir en hún líkt og María situr í stjórn Tilveru.
Mikilvægt sé að talað sé um ófrjósemi en hún sé oft á tíðum feimnismál. Talið er að einn af hverjum sex sem vill eignast barn eigi í erfiðleikum með það. Samtökin standa fyrir vitundarvakningu þessa dagana um ófrjósemi en á föstudaginn hitta félagsmenn heilbrigðisráðherra og afhenda honum reynslusögur fólks í þessum sporum.
„Við viljum bara að ráðherra hlusti og geti lesið þessa sögur til þess að hann átti sig á hvað fólk hefur þurft að ganga í gegnum,“ segir María Rut.
