Full­yrðingar um man­sal og stór­felldan launa­þjófnað rök­leysa

Fjallað var ítarlega um málið á Vísi í ágúst síðastliðnum. Starfsmennirnir þrír sem um ræðir eru allir af erlendum uppruna og voru sagðir hafa fengið lágmarkslaun fyrir allt að sextán klukkustunda vinnudag. Þeir hafi jafnframt búið í íbúð í eigu vinnuveitenda.

Málið var í kjölfarið tilkynnt til lögreglu, að því er Benóný Harðarson forstöðumaður kjaradeildar Fagfélaganna í samtali við fréttastofu í águst. Þá krafði Matvís veitingastaðinn Flame um þrettán milljónir í ógreidd laun fyrir hönd starfsmannanna í september.

Veitingastaðnum Flame var lokað í kjölfar umfjöllunar, hinn 19. ágúst síðastliðinn, og hefur ekki opnað aftur. Eigendur segja Matvís hafa „tekið kokkana í burtu svo eigendur staðarins gætu ekki annað gert en lokað.“

Eigandi veitingastaðanna tjáði sig einnig um málið og sagði ásakanirnar „kolvitlausar.“ Öll laun væru greidd samkvæmt gildandi kjarasamningum. Hann sagði enn fremur að fyrirtækið greiddi há laun, á bilinu sjö til átta hundruð þúsund krónur á mánuði.

Nú hefur borist formleg yfirlýsing frá eigendum veitingastaðanna.

Í yfirlýsingunni segir að undirbúningur að stefnu á hendur Matvís sé hafinn. Almennu verklagi hafi ekki verið fylgt við meðferð máls Flame, þar sem ítrekað hafi verið farið fram í fjölmiðlum með yfirlýsingum sem, samkvæmt yfirlýsingunni, eiga ekki að hafa verið réttar.

„Okkur langar að biðja fyrrum starfsfólk Flame innilegrar afsökunar á því að laun þeirra hafi ekki verið rétt reiknuð, það var ekki ætlunin. Við berum virðingu fyrir þeim og höfðum engan hug á að hlunnfara þau. Það er miður að þetta mál hafi bitnað á þeim. Starfsfólkið fékk greitt í samræmi við umsamin mánaðarlaun, hafði afnot af húnsæði, rafmagni, hita, interneti o.fl. Mánaðarlaunin voru og eru í samræmi við kjarasamning Matvís og Samtaka atvinnulífsins,“ segir í upphafi yfirlýsingarinnar.

Kolrangt að starfsfólk hafi unnið sextán tíma vinnudag

Fram kemur að starfsfólkið hafi aldrei unnið tíu til sextán tíma vinnudag, sex daga vikunnar, og forsvarsmenn veitingastaðanna segjast ekki átta sig á því hvers vegna Matvís hafi haldið því fram í fjölmiðlum. Hið rétta sé að starfsmenn hafi unnið á bilinu átta til níu tíma, fimm til sex daga vikunnar, með einstaka undantekningum.

„Við áttum okkur ekki á því af hverju Matvís kaus að fjalla um mál okkar í fjölmiðlum strax frá því málið kom upp og nær daglega á tímabili með röngum staðhæfingum og röngum fullyrðingum og gífuryrðum. Verklag Matvís og annarra stéttafélaga er á þá leið að ef grunur vaknar um rangar launagreiðslur að þá er haft samband við vinnuveitanda og honum gefinn kostur á að koma með sín sjónarmið og eftir atvikum leiðrétta misfellur í launaútreikningum,“ segir enn fremur í yfirlýsingunni.

Verklaginu hafi Matvís ekki fylgt. 

Ásakanirnar lagt reksturinn í rúst

Forsvarsmenn veitingastaðanna segja að þeir hafi fengið vitneskju um að laun hafi misreiknast og launaútreikningur borist frá Matvís í kjölfarið. Útreikninginn töldu lögmenn Flame rangan og voru starfsmönnunum greidd laun samkvæmt útreikningi lögmanna, að því er fram kemur í yfirlýsingunni.

„Alvarlegar ásakanir á hendur Flame, Bambus og eigendum staðanna á opinberum vettvangi hafa skaðað mannspor og lagt rekstur veitingastaðanna í rúst. Engar kröfur hafa verið gerðar vegna starfsfólks Bambus, einungis vegna starfsfólks Flame. Matvís skeyttu engu um afleiðingar þess að ganga fram með svo harkalegum hætti auk þess sem ekkert tilefni var til þess að gera slíkt. Þar sem eðlilegar verklagsreglur voru brotnar og farið fram opinberlega með rangar fullyrðingar þá neyðast staðirnir til að sækja tjón sitt á hendur Matvís með málsókn,“ segir í yfirlýsingunni að lokum.

Yfirlýsinguna má lesa í heild sinni hér að neðan.

• Yfirlýsing_FlamePDF17KB
  Sækja skjal