Klara söng á meðan Kim Kar­dashian gekk inn á veitinga­stað í Mílanó

Klara hefur samið tónlist fyrir sjónvarpsþætti í nokkur ár. Lög hennar hafa ómað í stórum þáttum á borð við Selling Sunset, Queer Eye for the Straight Guy, Love Island og NFL Play-offs.

Þegar Hulu þættirnir um Kardashians fjölskylduna hófu göngu sína fyrr á árinu var ákveðið að fyrirtækið sem Klara semur gjarnan fyrir skyldi sjá um tónlistarval í þáttunum. Þá hafa lög eftir Klöru orðið fyrir valinu oftar en einu sinni.

Fær alltaf jafn mikinn fiðring í magann

Klara segir það aldrei venjast að heyra lög eftir sjálfa sig, hvort sem það er í heimsfrægum sjónvarpsþáttum eða úti í matvöruverslun.

„Það er alltaf jafn mikill fiðringur í magann að heyra lögin sín spiluð útvarpi eða þáttum eða bara hvar sem er. Ég hef stundum verið í búðum, HM í Stokkhólmi, Starbucks í LA eða á mismunandi stöðum í heiminum og heyrt lag sem ég hef samið, hvort sem ég er að syngja það eða einhver annar og það er alltaf jafn skrítið og gaman.“

Einn vinsælasti raunveruleikaþáttur í heimi

Önnur þáttaröð af The Kardashians hóf göngu sína í september. Í nýjasta þættinum má greinilega heyra Klöru syngja á meðan leðurklædd Kim Kardashian labbar inn á veitingastað í Mílanó.

Í öðru atriði má svo heyra rödd Klöru óma á meðan Kim labbar út í bíl.

„Mér fannst þetta mjög skemmtilegt. Þetta er náttúrulega einn vinsælasti raunveruleikaþáttur í heimi og meira að segja ég hef horft á einn og einn þátt,“ segir Klara.

Þó svo Klara sé ekki mikill aðdáandi raunveruleikaþátta, eru Kardashians þættirnir af slíkri stærðargráðu að það er erfitt að láta þá framhjá sér fara.

Hitti Kim Kardashian í Playboy setrinu

Klara átti einnig lög í fyrri þáttaröð af The Kardashians. Í samtali við Vísi segist Klara þó aðeins einu sinni hafa hitt meðlim Kardashian fjölskyldunnar. Það var fyrir mörgum árum síðan þegar hún hitti Kim í veislu sem haldin var í Playboy setrinu.

„Ég spjallaði vissulega ekkert við hana meira en að heilsast ef ég man rétt.“

Kardashian áhorfendur skulu leggja vel við hlustir við áhorf á nýju þáttaröðinni, því það er ekki útilokað fleiri lög eftir Klöru eigi eftir að heyrast.

Vinnur að nýrri plötu

Í næsta mánuði er Klara á leið til Los Angeles þar sem hún mun vinna að nýrri plötu. Þá hefur hún verið mikið á faraldsfæti á þessu ári og ferðast meðal annars til London, Danmerkur, Svíþjóðar og Noregs til þess að vinna í tónlist.

„Það er það sem ég elska mest við að vera flutt heim. Ég á auðveldara með að taka að mér verkefni sem eru í Evrópu og Norðurlöndunum. Það var ekki hlaupið að því að fara svona langar ferðir þegar ég bjó ennþá í LA,“ segir Klara.