Innlent

Hafa á­hyggjur af skerðingu lyfja­af­greiðslu í Laugar­ási

Atli Ísleifsson skrifar
Afgreiðsla Lyfju í Laugarási.
Afgreiðsla Lyfju í Laugarási. Já.is

Sveitarstjórnir Bláskógabyggðar og Skeiða- og Gnúpverjahrepps hafa báðar lýst yfir áhyggjum af áformum um að loka lyfjaafgreiðslu Lyfju í Laugarási og að afgreiðslan færist inn á heilsugæsluna og starfsfólks þar.

Fram kemur í fundargerðum sveitarstjórnanna að Lyfja leitist nú eftir samningi við Heilbrigðisstofnun Suðurlands um að lyfjaafgreiðslan færist inn á heilsugæsluna í Laugarási.

Sveitarstjórn Skeiða- og Gnúpverjahreppi lýsti í gær yfir áhyggjum vegna umræddrar þjónustuskerðingar og hvatti til þess að lyfjaafgreiðslan verði með óbreyttu sniði í Laugarási.

Með breyttu fyrirkomulagi sé hætt við að þjónusta við notendur heilsugæslunnar verði skert, til dæmis hvað það varðar að fá lyfseðilsskyld lyf afgreidd í beinu framhaldi af læknisheimsókn. „Um mikilvæga þjónustu er að ræða fyrir íbúa alls svæðisins, sem sækja þjónustu heilsugæslu í Laugarási,“ segir í ályktun sveitarstjórnar.

Sveitarstjórn Bláskógabyggðar hafði áður ályktað um „nauðsyn þess að áfram verði lyfjaafgreiðsla í Laugarási“. 

„Sveitarstjórn Bláskógabyggðar lýsir yfir áhyggjum vegna umræddrar þjónustuskerðingar og hvetur til þess að lyfjaafgreiðsla verði með óbreyttu sniði í Laugarási,“ sagði í ályktun sveitarstjórnar Bláskógabyggðar.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.