Maður sleginn í höfuðið með bjórglasi fyrir utan skemmtistað

Ólafur Björn Sverrisson skrifar 25. september 2022 10:50

Árásin átti sér stað í miðbæ Akureyrar. Hún er talin alvarleg vegna þeirrar aðferðar sem var beitt. vísir/tryggvi páll

Alvarleg líkamsárás átti sér stað í miðbæ Akureyrar í nótt. Maður var sleginn í höfuð með bjórglasi og skarst illa. Sá var fluttur á sjúkrahúsið á Akureyri en ekki er talið að mennirnir hafi þekkst fyrir.

Erilsöm nótt er að baki hjá lögregluembættinu á Norðurlandi vestra, á Facebook greinir embættið frá 39 málum sem þurfti að sinna, þar af 14 tengd foktjónum. Embættið greinir frá því að tveir hafi gist fangageymslu, annar vegna alvarlegrar líkamsárásar fyrir utan skemmtistað og hinn vegna gruns um heimilisofbeldi. Tilkynningar eru enn að berast um foktjón, að sögn lögreglu.

Í máli þar sem bjórglasi var beitt er árásarþoli á fertugsaldri en árásarmaður á þrítugsaldri. Þetta staðfestir Hallgrímur Gíslason, varðstjóri lögreglunnar á Norðurlandri eystra.

„Þeir virðast ekki hafa þekkst en þetta hafa verið einhverjar stympingar sem enda með því að árásarmaður slær hann með glasi. Þetta flokkast sem alvarleg líkamsárás vegna aðferðarinnar, þannig flokkum við þetta í kerfinu núna.“

Hann segir slíkar árásir þó ekki hafa færst í aukana en nóttin hafi aðallega verið erilsöm vegna veðurtengdra tilvika.

Akureyri Lögreglumál

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.