Viðskipti innlent

Katrín Olga ráðin fram­kvæmda­stjóri nýs dóttur­fé­lags Lands­nets

Atli Ísleifsson skrifar
Katrín Olga Jóhannesdóttir.
Katrín Olga Jóhannesdóttir. Landsnet

Katrín Olga Jóhannesdóttir hefur verið ráðin framkvæmdastjóri nýs dótturfélags Landsnets sem hefur það hlutverk að setja á fót og reka heildsölumarkað raforku á Íslandi. Katrín Olga mun hefja störf um mánaðamótin.

Frá þessu segir í tilkynningu. Þar segir að Katrín Olga hafi áratuga reynslu sem stjórnandi og stjórnarmaður í íslensku atvinnulífi. Hún hafi verið formaður Viðskiptaráðs Íslands og verið fyrsta konan til að sinna því hlutverki. Katrín Olga er viðskiptafræðingur frá Háskóla Íslands með meistaragráðu frá University of Southern Denmark og viðbótarnám frá London Business School.

Haft er eftir Katrínu Olgu að það sé spennandi að fá tækifæri til að móta og innleiða nýjar aðferðir í orkuviðskiptum á Íslandi og að hana hlakki til að takast á við það verkefni.

„Það er mjög spennandi kafli framundan í sögu íslenskra orkuviðskipta þar sem bæði notkun og framleiðsla mun verða fjölbreyttari og flóknari en áður. Markmiðið með heildsölumarkaðnum er að skila neytendum hagkvæmasta verði hverju sinni en um leið tryggja orkuöryggi, stöðugleika og gagnsæi orkuverðs. Það er frábært tækifæri að taka þátt í að innleiða nýjar aðferðir í þessum efnum“ segir Katrín Olga.

Mikilvægur markaður

Þá er haft eftir Guðmundi I. Ásmundssyni, stjórnarformanni nýja fyrirtækisins og forstjóra Landsnets, að markaðurinn sé mikilvægur, meðal annars þegar komi að loftslagsmálum.

„Virkir orkumarkaðir eru mikilvægir í orkuöryggi þjóða og það sama gildir hér á landi. Skilvirkt aðgengi að markaði er nauðsynlegt en markaðsumhverfi orku er að breytast hratt í þá átt að notendur geta tekið þátt í rekstri kerfisins og fengið greitt fyrir þá þjónustu. Það er einungis hægt með gagnsæjum verðum, þannig að orka komi inn á kerfið og sé nýtt á réttum tíma. Orkumarkaðir eru einnig mikilvægir fyrir fjárfestingar í framleiðslu á orku en nýir framleiðendur, jafnvel með nýja tækni eins og vindorku, reiða sig á gagnsæ orkuverð til að meta hvort fjárfestingin sé hagkvæm. Fyrir okkur sem þjóð er þetta tvennt mjög mikilvægt í baráttunni við loftslagsvánna en grænbókin Staða og áskoranir í orkumálum, sem kom út nýlega, bendir á að tvöfalda þurfi orkuframleiðslu á næstu átján árum. Mögulega komumst við af með minna ef notendur geta tekið þátt í orkuviðskiptunum og hagrætt í sinni notkun,“ segir Guðmundur.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×