Erlent

For­sætis­ráð­herra Taí­lands vikið tíma­bundið úr em­bætti

Atli Ísleifsson skrifar
Deilt er um hvort forstætisráðherrann Prayuth Chan-ocha hafi setið lengur en þau átta ár sem stjórnarskrá landsins gerir ráð fyrir.
Deilt er um hvort forstætisráðherrann Prayuth Chan-ocha hafi setið lengur en þau átta ár sem stjórnarskrá landsins gerir ráð fyrir. AP

Æðsti dómstóll Taílands hefur tilkynnt að forsætisráðherranum Prayuth Chan-ocha hafi verið vikið tímabundið úr embætti.

Dómstóllinn hyggst taka til meðferðar kæru sem snýr að því hvort að Prayuth Chan-ocha hafi setið lengur í embætti en lög landsins geri ráð fyrir. Meirihluti dómara var fylgjandi því að forsætisráðherranum yrði vikið frá þar til að niðurstaða fæst í málinu.

Ekki er að fullu ljóst hver verði starfandi forsætisráðherra, en lögum samkvæmt ætti það að verða aðstoðarforsætisráðherrann Prawit Wongsuwan. Hann er náinn bandamaður Prayuth Chan-ocha og hluti af sömu klíku innan taílenska hersins sem kom Prayuth Chan-ocha í forsætisráðherrastólinn að loknu valdaráni hersins.

Stjórnarandstaðan í Taílandi vill meina að Prayuth Chan-ocha ætti að fara frá þar sem stjórnarskrá landsins geri ráð fyrir að forsætisráðherra geti einungis setið í átta ár í embætti. Vill stjórnarandstaðan meina að þessi átta ár hafi runnið sitt skeið síðastliðin þriðjudag.

Stuðningsmenn Chan-ochas eru þó ekki sammála þessari túlkun þar sem ný stjórnarskrá hafi tekið gildi 6. apríl 2017 og því sé rétt að miða við þá dagsetningu.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×