Viðskipti innlent

Tuttugu sveitar­stjórnar­menn með yfir tvær milljónir á mánuði

Árni Sæberg skrifar
Þetta fólk stýrði sveitarfélögunum á höfuðborgarsvæðinu árið 2021 og fékk allt rúmlega tvær milljónir króna á mánuði fyrir. Mennirnir tveir til vinstri fengu rúmlega þrjár.
Þetta fólk stýrði sveitarfélögunum á höfuðborgarsvæðinu árið 2021 og fékk allt rúmlega tvær milljónir króna á mánuði fyrir. Mennirnir tveir til vinstri fengu rúmlega þrjár. Vísir/Vilhelm

Borgarstjóri, bæjarstjórar og forsetar bæjarstjórna höfðu það gott árið 2021. Tuttugu sveitarstjórnarmenn voru með yfir tvær milljónir í launatekjur á mánuði í fyrra.

Gunnar Einarsson, fyrrverandi bæjarstjóri Garðabæjar til sautján ára, var tekjuhæsti sveitarstjórnarmaður landsins í fyrra með ríflega 3,2 milljónir króna á mánuði, að því er segir í tekjublaði Frjálsrar Verslunar sem kom út í dag.

Dagur B. Eggertsson borgarstjóri fylgir honum fast á hæla með þrettán þúsund krónum minna í tekjur.

Í þriðja sæti listans yfir sveitarstjórnarmenn er Gunnar Valur Gíslason, bæjarfulltrúi í Garðabæ, með tæplega 2,9 milljónir króna á mánuði. Það þýðir þó ekki að Garðabær greiði almennum bæjarfulltrúum ofurlaun. Gunnar Valur kom nýr inn í bæjarstjórn eftir sveitarstjórnarkosningarnar í vor og hafði fyrir það verið framkvæmdastjóri fasteignafélagsins Íþöku ehf.

Tuttugu launahæstu sveitarstjórnarmenn landsins í þúsundum króna talið

  1. Gunnar Einarsson, fv. bæjarstj. Garðabæ -3.224
  2. Dagur B Eggertsson, borgarstjóri - 3.211
  3. Gunnar Valur Gíslason, bæjarfulltrúi Garðabæ - 2.866
  4. Halla Björk Reynisdóttir, fors. bæjarstj. Akureyrar - 2.620
  5. Magnús Örn Guðmundsson, fv. forseti bæjarstj. Seltjarnarnes. - 2.574
  6. Jón Björn Hákonarson, forseti bæjarstj. Fjarðabyggðar - 2.478
  7. Sævar Freyr Þráinsson, bæjarstjóri Akraness - 2.389
  8. Aldís Hafsteinsdóttir, fv. bæjarstj. í Hveragerði - 2.329
  9. Ármann Kristinn Ólafsson, fv. bæjarstj. Kópavogi - 2.329
  10. Haraldur Sverrisson, fv. bæjarstj. Mosfellsbæjar - 2.292
  11. Kjartan Már Kjartansson, bæjarstj. Reykjanesbæ - 2.272
  12. Regína Ásvaldsdóttir, fv. bæjarstj. Akranesi - 2.264
  13. Jóhann Friðrik Friðriksson, fv. forseti bæjarstj. Reykjanesb. - 2.243
  14. Ásthildur Sturludóttir, bæjarstj. Akureyri - 2.187
  15. Ásgerður Halldórsdóttir, fv. bæjarstj. Seltjarnarnesi - 2.134
  16. Haraldur Líndal Haraldsson, ráðgj. í sv.stj. málum - 2.132
  17. Aðalsteinn Leifsson, ríkissáttasemjari - 2.130
  18. Rósa Guðbjartsdóttir, bæjarstjóri í Hafnarfirði - 2.108
  19. Kristinn Jónasson, bæjarstj. í Snæfellsbæ - 2.044
  20. Birgir Gunnarsson, fv. bæjarstjóri Ísafjarðabæjar - 2.043

Tekjublað Frjálsrar verslunar kom út í dag en rétt er að árétta að um er að ræða útsvarsskyldar tekjur á árinu 2021 og þurfa þær ekki að endurspegla föst laun viðkomandi. Munurinn getur falist í launum fyrir setu í nefndum og önnur aukastörf og hlunnindi vegna kaupréttarsamninga. Í launum sumra kann að vera falinn bónus vegna ársins 2020 sem var greiddur árið 2021.

Miðað er við útsvarsstofn samkvæmt álagningarskrá en í tölunum eru ekki fjármagnstekjur, til dæmis af vöxtum, arði eða sölu hlutabréfa. Sleppt er skattfrjálsum dagpeningum, bílastyrkjum og greiðslum í lífeyrissjóði. Þá ber að hafa í huga að inn í tekjunum geta líka verið einskiptisgreiðslur vegna úttektar á séreignasparnaði hjá lífeyrissjóði.

Verktakagreiðslur flokkast ekki sem útsvarsskyldar tekjur og eru því ekki teknar fyrir í álagningaskrá Ríkisskattstjóra sem Tekjublaðið styðst við.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.