Úkraínuher hefur staðfest að borgin Lysychansk í austurhluta Úkraínu er nú fallin í hendur Rússa. Eftir afar harða bardaga síðustu daga hafa úkraínskar varnarsveitir neyðst til að hörfa frá borginni en áður höfðu Rússar lýst því yfir að borgin væri nú þeirra.
Þar með hafa Rússar náð fullu valdi á öllu Luhansk héraði. Úkraínumenn segja að við ofurefli hafi verið að etja, Rússar hafi öflugri vopn, betri flugvélar og fleiri hermenn. Volodómír Selenský forseti Úkraínu lofaði því að Úkraínuher muni ná Lysychansk aftur á sitt vald um leið og þeim berst betri vopnabúnaður frá Vesturlöndum. Þetta kemur fram í umfjöllun BBC.
Rússar hafa einnig haldið árásum sínum áfram vestar í landinu en þannig létu að minnsta kosti sex lífið í borginni Slovyansk eftir harðar loftárásir. Slovyansk er í Donetsk héraði sem ásamt Luhansk myndar hið svokallaða Donbass svæði sem Rússar leggja nú höfuðáherslu á að ná tökum á.
Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.
Fleiri fréttir
Sjá meira
