Katrín segir ó­líka stefnu stjórnar­flokkanna í út­lendinga­málum ekki þurfa að koma á ó­vart

Því hefur verið mótmælt að vísa ætti stórum hópi fólks sem leitaði verndar eða hælis hér úr landi og fullyrt að það væru allt að 300 manns. Félagsmálaráðherra og jafnvel fleiri ráðherrar Vinstri grænna hafa lýst óánægju með þessar fyrirætlanir innan ríkisstjórnarinnar.

Katrín Jakobsdóttir forsætisráðherra segir málið hafa verið rætt á ríkisstjórnarfundi í morgun.

„Dómsmálaráðherra hefur að beiðni minni verið að taka saman gögn um þennan hóp sem verið hefur til umræðu. Hann kom með stöðu mála inn á fund hér áðan þar sem kemur fram að þessi hópur er raunar undir 200 manns, það er að segja hópurinn sem kemur til greina til að vísa úr landi,“ segir Katrín.

Enn eigi eftir að fara betur yfir samsetningu hópsins og ljóst að þar væri fólk innan um sem ekki verði vísað úr landi. Samkvæmt upplýsingum frá Útlendingastofnun í dag bíða 197 þess að vera fylgt úr landi.

„Stefna míns flokks er algerlega skýr. Það eru raunar þrír flokkar í þessari ríkisstjórn og hver er með sína stefnu í þessum málum. Þannig að það þarf ekki að koma á óvart að við séum ekki fullkomlega sammála þegar kemur að útlendingamálum,“ segir forsætisráðherra.

Myndin muni skýrast betur á næstu dögum. Forsætisráðherra er sérstaklega að kanna hvort önnur ríki væru að senda flóttafólk til baka til Grikklands þar sem aðstæður hafa verið sagðar slæmar vegna mikils fjölda flóttamanna.

„Við erum eingöngu búin að fá svör frá tveimur ríkjum, Finnlandi og Danmörku, sem eru að senda fólk til Grikklands. En við erum að afla frekari upplýsinga um þau mál,“ segir Katrín.

Fram hefur komið að konur frá Sómalíu kvíði því að lenda á götunni í Grikklandi.

Brottvísanir hafa áhrif á Katrínu

Þetta hlýtur að hafa áhrif á þig sem manneskju að heyra persónulegar sögur og ótta fólks að vera sent í burtu?

„Að sjálfsögðu hefur það áhrif á mig sem manneskju. Að sjálfsögðu hefur það áhrif á okkur öll sem manneskjur. Enda er þetta ekki einhver einn hópur. Þetta eru einstaklingar. Einstaklingar sem hafa ólíka sögu og ólíkar aðstæður og um það snýst auðvitað kerfið okkar og á að snúast, að það sé tekið tillit til aðstæðna einstaklinga,“ segir Katrín.

Jón Gunnarsson dómsmálaráðherra segir ekkert hafa breyst í framkvæmd þessara mála frá upphafi fyrri ríkisstjórnar árið 2017 annað en aðstæður í þeim löndum sem til hafi staðið að senda fólk til. Mörg hundruð manns hafi verið vísað úr landi frá 2017 samkvæmt þessum reglum. Engir hópflutningar standi fyrir dyrum og fólk í veikri stöðu bíði ekki brottfarar.

„Kona gengin átta mánuði á leið fær auðvitað sitt mál endurupptekið eins og lög og reglur gera ráð fyrir og verður auðvitað ekki send úr landi við þær aðstæður. Þannig aðforsendur hafa breyst. Það stendur ekki til að senda neitt fjölskyldufólk til Grikklands,“ segir Jón.

Guðmundur Ingi Guðbrandsson félagsmálaráðherra segir skiptar skoðanir og ólíkar stefnur um útlendingamál hjá ríkisstjórnarflokkunum. Ríkisstjórnin hafi hins vegar borið gæfu til að leysa ágreiningsmál og hann hafi trú á að það gerist einnig núna.

Þannig að það er ekki tifandi sprengja undir ríkisstjórninni?

„Nei, það myndi ég ekki segja,“ segir félagsmálaráðherra.