Innlent

Telur al­menning klárari en svo að taka undir kröfu VR

Óttar Kolbeinsson Proppé skrifar
Halldór á fundi hjá ríkissáttasemjari við gerð síðustu kjarasamninga. Ragnar situr á móti honum og sést hér neðst í vinstra horni myndarinnar 
Halldór á fundi hjá ríkissáttasemjari við gerð síðustu kjarasamninga. Ragnar situr á móti honum og sést hér neðst í vinstra horni myndarinnar  vísir/vilhelm

Framkvæmdastjóri Samtaka atvinnulífsins segist telja að almenningur sé skynsamari en svo að taka undir kröfur formanns VR um miklar launahækkanir í haust í ljósi vaxtahækkana Seðlabankans. Hann segir alla í landinu tapa á aukinni verðbólgu.

Seðlabankinn hækkaði vexti um eitt prósentustig í gær.

Halldór Benjamín Þorbergsson framkvæmdastjóri Samtaka atvinnulífsins, segir Seðlabankann verða að stemma stigu við verðbólgunni og að til þess séu margar leiðir.

„Það sem veldur manni áhyggjum er þetta: húsnæðisliðurinn er ráðandi í verðbólgutölunum en hins vegar þýðir ekkert að stinga höfðinu í sandinn hvað það áhrærir að allir undirliðir verðbólgunnar eru að fara hækkandi á milli mánaðanna sem setur þessa ákvörðun Seðlabankans í skiljanlegra samhengi að mörgu leyti,“ segir Halldór Benjamín. 

Ragnar Þór Ingólfsson, formaður stéttarfélagsins VR, sagði í kvöldfréttum Stöðvar 2 í gær að þessi hækkun kæmi sér illa fyrir fyrirtæki landsins, sem skulduðu í dag samtals fimm þúsund milljarða.

Hækkun vaxta um eitt prósentustig þýddi fimmtíu milljarðar ofan á skuldirnar, sem jafngilti fimm prósenta launahækkun.

„Það er hægt að fara í alls konar reiknikúnstir. En kjarni málsins er þessi; á verðbólgu tapa allir, sama hvort það eru heimilin eða fyrirtækin í landinu. Og Seðlabankanum er lögum samkvæmt gert að stuðla að verðstöðugleika í landinu,“ segir Halldór Benjamín.

Ragnar Þór sagði einnig að VR myndi reikna út þann kostnað sem félli á félagsmenn við vaxtahækkunina og bæta honum við kröfugerð sína við kjarasamningsgerð í haust.

„Ég held að fólkið í landinu sé einfaldlega klárara en svo að taka undir málflutning af þessum toga. Í störukeppni við Seðlabanka Íslands tapa allir,“ segir Halldór Benjamín.

Hann treysti bankanum og taki mark á skilaboðum sem koma frá honum.

Því gerir hann ráð fyrir að stjórnvöld og aðilar vinnumarkaðarins taki höndum saman við að dempa verðbólguna og sömuleiðis sé því ekki svigrúm fyrir miklar launahækkanir í komandi kjarasamningsgerð.

Halldór og Ragnar takast í hendur við undirritun síðustu kjarasamninga árið 2019.vísir/vilhelm

„Seðlabankastjóri orðaði þetta með þeim hætti í fjölmiðlum í gær að það væri að skjóta sig í fótinn að fara í mjög agressíva kjarasamninga á þessum tímapunkti,“ segir Halldór Benjamín.

Og þó stefnir allt í harða kjarabaráttu ef marka má orð verkalýðsleiðtoganna.

„Auðvitað geta aðilar bara talað með ýmsum hætti og ég ætla ekkert að tjá mig sérstaklega um það. Það er hins vegar þannig að það er til eitthvað sem heitir efnahagslegur raunveruleiki,“ segir Halldór Benjamín.

„Og á endanum munum við þurfa að díla við þann raunveruleika. Og ég legg áherslu á að verðbólga er kostnaðarsöm fyrir okkur öll og markmið númer eitt, tvö og þrjú er að koma í veg fyrir að hún fari úr böndunum.“



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.