Innlent

„Þau halda páskana mjög hátíðlega og þetta skiptir þau máli“

Fanndís Birna Logadóttir skrifar
Samtökin Flottafólk reka griðarstað við Guðrúnartún og athvarf við Hátún fyrir flóttafólk. Myndin er tekin í matsali auglýsingastofunnar Pipar/TBWA við Guðrúnartún í síðasta mánuði. 
Samtökin Flottafólk reka griðarstað við Guðrúnartún og athvarf við Hátún fyrir flóttafólk. Myndin er tekin í matsali auglýsingastofunnar Pipar/TBWA við Guðrúnartún í síðasta mánuði.  Vísir/Egill

Hátt í 800 flóttamenn frá Úkraínu eru hér á landi yfir páskana en þeirra dymbilvika hófst í gær. Samtökin Flottafólk buðu flóttamönnum upp á mat og páskaegg fyrir helgi og er stefnt á að útvega guðsþjónustu frá Úkraínu í gegnum fjarfundarbúnað í dag. Forsvarsmaður samtakanna segir mikilvægt að fólkið einangrist ekki.

Frá því að innrásin hófst hafa 772 flóttamenn frá Úkraínu komið til Íslands. Samtökin Flottafólk reka griðastað flóttamanna að Guðrúnartúni og athvarf barna og foreldra að Hátúni. Sveinn Rúnar Sigurðsson, læknir sem er í forsvari fyrir hópinn, segir þau hafa tekið við töluverðum fjölda fólks á miðvikudag, síðasta daginn fyrir páska.

„Við áttum þar góða stund yfir góðum mat og við afhentum öllum páskaegg, eða páskaegg og súkkulaðiplötur, með aðstoð góðra fyrirtækja,“ segir Sveinn.

Sveinn Rúnar Sigurðsson hefur sinnt verkefnum tengdum flóttafólki frá Úkarínu síðustu vikur.Vísir/Sigurjón

„Við erum svo að setja núna upp fjarfundarviðburð þar sem að Úkraínumenn og flóttamenn á Íslandi geta sótt athöfn á netinu beint frá Úkraínu í samvinnu við biskup þar,“ segir hann enn fremur.

Páskarnir eru með örlítið öðruvísi sniði hjá Úkraínumönnum en þeirra dymbilvika hófst á miðnætti og er páskadagur eftir viku.

„Þau halda páskana mjög hátíðlega og þetta skiptir þau máli,“ segir Sveinn.

Mikilvægt að fólk einangrist ekki

Sveinn segir mikilvægt að Úkraínumenn haldi í sínar hefðir og einangri sig ekki, sérstaklega á þessum tíma.

„Maður trúir því staðfastlega, og bara á grunni míns starfs sem læknir, að þegar fólk á um sárt að binda, eins og fólkið sem kemur hingað, að það eyði ekki tíma sínum einangrað inni á hótelherbergi heldur að það gangi að og nýti sér nokkuð þétta dagskrá, bæði varðandi samveru og matarhittinga en ekki síst viðburði,“ segir Sveinn.

Hann vísar í því samhengi til þess að unnið sé að verkefni í samstarfi við ferðaþjónustuna og fleiri aðila, svokallaðan flóttamannakvóta á ýmsa viðburði. Þannig fái flóttafólk aðgengi að ýmsum viðburðum líkt og Íslendingar.

„Heilt yfir þá er maður afskaplega ánægður með stöðu mála bæði hjá ríki og sveitarfélögum og ég held að við getum öll einhvern veginn horft yfir öxl og verið stolt af þessu viðbragði,“ segir hann enn fremur.

Gert er ráð fyrir að fleiri flóttamenn komi til landsins eftir páska og miða aðgerðir að því að gera þá hluta af samfélaginu.

„Til lengri eða skemmri tíma, ég er reyndar viss um það að mikið af þessu fólki vill snúa aftur heim um leið og stríðið lengur en við vitum ekki hversu lengi þetta stríð mun vara og óvissan er náttúrulega mjög erfið,“ segir Sveinn.


Tengdar fréttir

Vaktin: Hafna afarkostum Rússa og segjast ætla að berjast til hins síðasta

Svo virðist sem að Úkraínumenn hafi ekki orðið við kröfum Rússa um að síðustu varnarliðsmenn borgarinnar Maríupol myndu yfirgefa borgina. Rússar höfðu veitt varnarliðinu frest í nótt til að yfirgefa síðasta vígið, stálverksmiðju við höfnina í borginni. Fresturinn rann út í morgun án viðbragða frá Úkraínu.

„Dauðinn á ekki síðasta orðið“

Agnes M. Sigurðardóttir, biskup Íslands, flutti páskapredikun sína í Dómkirkjunni í morgun en predikunin í ár var óneitanlega lituð af stríðinu í Úkraínu. Víða um heim megi sjá merki eyðileggingar og dauða þar sem fórnarlömbum fjölgar en boðskapur Krists veiti fólki stuðning. 

760 Úkraínumenn sótt hér um alþjóðlega vernd

Alls hafa 760 einstaklingur með tengsl við Úkraínu sótt um alþjóðlega vernd hér á landi eftir að innrás Rússa hófst í Úkraínu í febrúar. Um að ræða 461 konu, 198 börn og 146 karla.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×