Segir hryllinginn í Bucha að­eins eitt dæmi af mörgum og krefst að­gerða

Selenskí fór sjálfur til Bucha í gær og ræddi þar við íbúa en lýsingar hans af aðstæðum í bænum voru hryllilegar. „Þeir drápu heilu fjölskyldurnar, fullorðna og börn, og þeir reyndu að brenna líkin,“ sagði Selenskí. Hann sagðist ávarpa ráðið fyrir hönd allra þeirra sem hafa fallið í árásum Rússa.

„Sumir voru skotnir á götum úti, öðrum var hent í brunna til að deyja. Þau eru að kveljast. Þau voru drepin í íbúðum sínum, húsin sprengd upp með jarðsprengjum, almennir borgarar voru kramdir af skriðdrekum meðan þeir sátu í bílum sínum á miðjum vegi, aðeins fyrir ánægju [hermennanna],“ sagði Selenskí.

„Þeir skáru af útlimi, skáru þau á háls. Konum var nauðgað og þær drepnar fyrir framan börnin þeirra. Tungur þeirra voru rifnar út, aðeins því að árásaraðilarnir heyrðu ekki það sem þeir vildu heyra frá þeim,“ sagði hann enn fremur.

Vill réttarhöld í anda Nuremberg-réttarhaldanna

Hann sagði heiminn ekki hafa séð aðra eins stríðsglæpi frá því að seinni heimsstyrjöldinni lauk og vísar til þess að Rússar hafi vísvitandi ráðist á almenna borgara. Aðgerðir þeirra í Bucha væru aðeins eitt dæmi um það sem rússneskar hersveitir hafi verið að gera í Úkraínu á síðustu 40 dögum. Þá væri það ljóst hvernig þeir munu bregðast við þessum ásökunum.

„Þeir munu kenna öllum öðrum um aðeins til að réttlæta sínar eigin gjörðir. Þeir munu segja að það séu ýmsar útgáfur, mismunandi útgáfur, og að það sé ómögulegt að sannreyna hver þeirra er sönn. Þeir munu jafnvel segja að líkum hinna látnu hafi verið hent og að upplýsingar hafi verið falsaðar,“ sagði Selenskí.

Forsetinn gagnrýndi harðlega skort á alvöru viðbrögðum frá alþjóðasamfélaginu og velti fyrir sér tilgangi Öryggisráðsins, ef það gæti ekki tryggt þeirra öryggi. Hann sagði mikilvægt að Rússar verði stöðvaðir sem fyrst og kallaði eftir réttarhöldum í anda Nuremberg-réttarhaldanna.

Þá vísaði hann til fyrstu greinar stofnskrár Sameinuðu þjóðanna, að viðhalda friði og sjá til þess að friði sé fylgt. „Hvar er friðurinn? Hvar eru þessar tryggingar sem Sameinuðu þjóðirnar þurfa að tryggja?“ spurði forsetinn og krafðist þess að Rússum yrði vikið úr ráðinu, enda gjörðir þeirra ekkert öðruvísi en hryðjuverkamanna.

Afleiðingar stríðsins gríðarlegar

Antonio Guterres, aðalframkvæmdastjóri Sameinuð þjóðanna, hafði ávarpað fundinn á undan Selenskí en líkt og við var að búast minntist hann á voðaverkin í Bucha. Hann sagðist aldrei munu gleyma myndunum af látnum íbúum og að hann væri uggandi yfir fregnum af stríðsglæpum Rússa.

Guterres sagði mikilvægt að bregðast við sem fyrst þar sem afleiðingar stríðsins hafa þegar verið gríðarlegar. Rúmlega tíu milljón manns eru nú á vergangi í Úkraínu og hafa markaðir heimsins orðið fyrir þungu höggi vegna mikilla verðhækkanna.

Martin Griffiths, aðstoðarframkvæmdastjóri mannúðardeildar Sameinuðu þjóðanna, og Rosemary DiCarlo, aðstoðarframkvæmdastjóri stjórnmálauppbyggingar og friðarumleitana, tóku í sama streng og Guterres.