Þór­dís Erla bæjar­listar­maður Sel­tjarnar­ness

Þórdís Erla Zoëga er fædd og uppalin á Seltjarnarnesi. Hún er með BFA gráðu úr Audio Visual deild Gerrit Rietveld Academy í Amsterdam og diplómu í vefþróun úr Vefskólanum. Þórdís hefur rannsakað myndheim skynjunar og sjónrænnar villu í innsetningum sínum sem oft eru staðsettar milli skúlptúrs og hreyfimyndar, og þá sérstaklega notkun á litbreytifilmu, segir í tilkynningu frá Seltjarnarnesbæ.

„Þórdís Erla var tilnefnd til Grímunnar árið 2016 fyrir Búninga ársins í verkinu Dada Dans sem var unnið í samvinnu við Íslenska Dansflokkinn. Hún stofnaði nýverið hönnunarstúdíóið Stúdíó Flötur ásamt manni sínum og grafíska hönnuðinum Kristjáni Jóni Pálssyni. Stúdíó Flötur sérhannar vínylmottur í takmörkuðu upplagi og hugsa rými heimilisins fyrir listaverk á nýjan hátt,“ segir enn fremur.

Þórdís Erla hefur víða haldið myndlistarsýningar, til að mynda í Amsterdam, Stokkhólmi, Berlín og í Tékklandi. Hér á Íslandi hefur hún einnig komið víða við en hún hefur meðal annars gert verk fyrir Listahátíð í Reykjavík, Gerðarsafn og sýnt í D-sal Hafnarhússins.

Þetta er í tuttugasta og sjötta sinn sem Seltjarnarnesbær veitir viðurkenninguna. Guðrún Jónsdóttir formaður menningarnefndar bæjarins veitti Þórdísi Erlu viðurkenningarskjal ásamt einnar milljónar krónu starfsstyrk. 

Í tilefni af útnefningu bæjarlistarmannsins hefur verið sett upp sýning á Bókasafni Seltjarnarness og fólk er hvatt til að kynna sér sýninguna.