Hákarl banaði manni fyrir framan stangveiðimenn

Samúel Karl Ólason skrifar 16. febrúar 2022 16:06

Vitni segja hvítháf hafa ráðist á manninn. Getty

Maður sem var á sundi undan ströndum Sydney í Ástralíu í morgun var drepinn af hákarli. Nokkur vitni voru að árásinni sem var einungis nokkra metra frá landi og segja vitnin að hvítháfur hafi banað manninum.

ABC News í Ástralíu segir þetta í fyrsta sinn sem hákarl banar manneskju í Sydney í nærri því sextíu ár.

Stangveiðimaður sem ræddi við ABC segir að um mann hafi verið að ræða. Hann hafi verið í blautbúning og hafi verið að synda fram hjá þegar hann byrjaði að öskra og var dreginn á kaf af hákarlinum.

Maðurinn sagði árásina hafa staðið yfir í nokkrar sekúndur.

„Þetta var hræðilegt,“ sagði maðurinn. Hann sagðist hafa kastað ítrekað upp í kjölfarið og hætti ekki að skjálfa. Fleiri stangveiðimenn urðu vitni að árásinni.

Líkamsleifar fundust í sjónum þar sem árásin átti sér stað og var blek sett í sjóinn á staðnum til að sjá hvert líkamsleifar gætu hafa rekið.

Þá hafa myndbönd sem tekin voru á meðan á árásinni stóð og í kjölfar hennar verið í dreifingu á netinu. TMZ birti eitt þeirra.

„Einhver var étinn af hákarli,“ er það fyrsta sem maðurinn sem tók myndbandið sagði.

Ástralía

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.