Skýrsla Henrys: Hetjurnar okkar munu vinna til verðlauna í framtíðinni

Ég skrifaði um það í tryllingnum í riðlakeppninni að ég vildi sjá liðið komast áfram svo það gæti mátað sig við bestu lið heims og komist að því hvar liðið stæði eiginlega í heimsboltanum í dag.

Við fengum heldur betur svar við því. Ísland er aftur komið með heimsklassalið og stendur nokkurn veginn jafnfætis við bestu lið heims. Það vantaði grátlega lítið upp á að liðið myndi berjast um verðlaun á þessu móti.

Það er ekki nokkur efi í mínum huga eftir þetta mót að strákarnir okkar munu vinna til verðlauna í framtíðinni. Liðið sprakk út í ómögulegum aðstæðum og sýndi þrátt fyrir mótlætið endalaus gæði og risastórt hjarta. Það er einstakur liðsandi í þessu landsliði og með fullmannaðan bát getur þetta lið siglt alla leið.

Nánast öll lið urðu fyrir áfalli og áföllum á þessu móti en fá lið lentu eins illa í því og Ísland því afar margir lykilmenn duttu út. Þá kom í ljós að breiddin í íslenska handboltalandsliðinu er greinilega meiri og betri en nokkurn óraði fyrir. Það eru líka frábær tíðindi. Það verður ekkert grín að velja landsliðshópa framtíðarinnar með alla þessa snillinga sem gera kröfu á sæti.

Guðmundur Þórður Guðmundsson lagði upp í vegferð fyrir rúmum þremur árum síðan með háleit markmið. Sú vegferð var ekki alltaf auðveld en hann missti aldrei fókus á verkefninu. Einu sinni sem oftar stendur hann uppi sem sigurvegarinn. Það hlýtur að vera algjört forgangsatriði hjá HSÍ að tryggja sér þjónustu hans áfram.

Ómar Ingi Magnússon stimplaði sig síðan eftirminnilega inn á stóra sviðið. Hann sýndi og sannaði að hann er orðinn einn besti leikmaður heims. Það hefur enginn leikið betur en hann á þessu móti. Snillingur.

Viktor Gísli Hallgrímsson sprakk síðan út á mótinu eins og beðið hefur verið eftir. Stórkostleg tíðindi. Hefur fulla burði til þess að komast í heimsklassa og loka íslenska búrinu næstu fimmtán árin.

Við eigum svo mikið af hágæðaleikmönnum á frábærum aldri. Janus Daði lygilegur í dag, nýkominn úr Covid-klefanum sínum, og sömu sögu að segja af Elvari Erni. Þvílík frammistaða hjá þeim í dag.

Hershöfðinginn Ýmir Örn leiðir svo vörnina með gæðamenn á borð við Elvar Örn og Elliða Snæ með sér. Innkoma Elvars Ásgeirssonar í mótið var lygileg og það má í raun hrósa öllum sem tóku þátt. Það stigu allir upp og skiluðu sínu. Alvöru lið!

Þetta skrautlega Covid-mót mun aldrei gleymast en í framtíðinni verður þetta mótið sem lagði grunninn að afrekum og verðlaunum framtíðarinnar. Þessu liði eru allir vegir færir. Takk fyrir mig, drengir. Þið voruð stórkostlegir.