Einkunnir á móti Noregi: Ómar Ingi og Elvar fá báðir hæstu einkunn

Íslenska handboltalandsliðið var grátlega nálægt því að tryggja sér fimmta sætið í framlengdum leik á móti Noregi í leiknum um fimmta sætið á Evrópumeistaramótinu 2022 í Ungverjalandi og Slóvakíu.

Strákarnir okkar komu til baka með magnaðri karakterframmistöðu í seinni hálfleik en lokaskotið hitti því miður ekki tómt norskt mark og það var aðeins of mikið til ætlast að örþreyttir fætur næðu að klára Norðmenn í framlengingunni.

Líkt og áður þá gefur íþróttadeild Vísis og Stöðvar tvö leikmönnum og þjálfaranum einkunnir fyrir frammistöðu sína.

Ómar Ingi Magnússon var besti leikmaður íslenska liðsins í kvöld að mati okkar en Elvar Örn Jónsson fær líka sexu eins og Guðmundur Guðmundsson þjálfari. Þeir Viktor Gísli Hallgrímsson, Bjarki Már Elísson, Janus Daði Smárason, Ýmir Örn Gíslason og Ágúst Elí Björgvinsson fá allir líka fimmu þökk sé magnaðri endurkomu íslenska liðsins í seinni hálfleiknum.

Leikmenn og þjálfarar fá einkunn á bilinu 1-6 með umsögn, en neðst í fréttinni má sjá hvað hver einkunn þýðir.

Einkunnir Íslands gegn Noregi:

- Byrjunarlið Íslands í leiknum -

Viktor Gísli Hallgrímsson, mark - 5 (10/1 varið skot- 44:56 mín.) Átti magnað mót, loksins þegar hann fann taktinn. Hélt liðinu á floti í fyrri hálfleik með frábærum vörslum. Mætti svo aftur til leiks og sýndi okkur og sannaði að Ísland hefur eignast markvörð í fremstu röð.

Bjarki Már Elísson, vinstra horn - 5 (5/2 mörk - 69:45 mín.) Skilaði sínu hnökralítið í enn einum leiknum. Hefði getað nýtt færin sín betur en í raun er ekki hægt að fara fram á meira í leik sem þessum þar sem allt vara að fara á hjörunum.

Ólafur Guðmundsson, vinstri skytta - 2 (1 mark - 35:33 mín.) Kom úr einangrun og var í engum takti við leikinn þegar hann byrjaði. Átti erfitt uppdráttar og náði sér aldrei á strik eins og við þekkjum Ólaf Guðmundsson best. Skilaði sínu varnarlega en hefur átt betri leiki.

Janus Daði Smárason, leikstjórnandi - 5 (8 mörk - 39:36 mín.) Stórkostlegur í síðari hálfleik. Fann þá fínan rytma í sinn leik og sýndi í raun í hvað hann er spunnið. Vonandi nær hann að stíga eitt skref til viðbótar með íslenska landsliðinu því við þurfum á því að halda.

Ómar Ingi Magnússon, hægri skytta - 6(10/2 mörk - 60:40 mín.) Það er fæddur nýr Ólafur Stefánsson. Auðvitað gildishlaðið. Besti maður mótsins, besti maður íslenska liðsins og líklega einn af þremur bestu handboltamönnum heims. Takk fyrir Ómar Ingi.

Sigvaldi Guðjónsson, hægra horn - 4 (2 mörk - 66:14 mín.) Átti frábært mót. Auðvitað hefðu menn viljað fá meira frá Sigvalda og sérstaklega þá þegar mest á reyndi í þessum leik. Sigvaldi sannaði á þessu móti að hann er í dag einn besti hægri hornamaður heims.

Ýmir Örn Gíslason, lína - 5 (1 mark - 59:10 mín.) Átti hreint ótrúlegt mót. Einn af betri varnarmönnum mótsins. Orkan, viljinn, krafturinn, dugnaðurinn og sú útgeislun sem er af Ými Erni smitar út frá sér til íslenska liðsins og allra sem á horfa.

Elvar Örn Jónsson, vörn, vinstri skytta - 6 (6 mörk, 7 stopp - 59:35 mín.) Lék sinn langbesta landsleik. Var hreint magnaður á báðum endum vallarins. Var nánast á annarri löppinni á lokakafla leiksins en þvílík frammistaða. Þvílíkur leikmaður.

- Menn sem komu inn af bekknum í leiknum -

Ágúst Elí Björgvinsson, mark - 5 (6 varin skot- 20:07 mín.) Átti frábæra innkomu í leikinn. Það var ekki einfalt að koma inn í liðið á ögurstundu en náði að verja mikilvæga bolta. Hefur sannarlega stimplað sig inn í þetta framtíðarlandslið Íslands.

Elvar Ásgeirsson, vinstri skytta - 2 (0 mörk - 22:47 mín.) Náði ekki að byrja leikinn af sama krafti og þá leiki sem hann hefur spilað. Lagði sitt að mörkum í frábæru íslensku liði. Leikmaður sem erfitt verður að ganga fram hjá þegar liðið verður valið fyrir undankeppni heimsmeistaramótsins í vor. Til hamingju með gott mót Elvar.

Viggó Kristjánsson, hægri skytta - 2 (0 mörk - 4:33 mín.) Eftir stórleik á móti Frökkum náði Viggó sér einfaldlega ekki á strik. Við þurfum að gefa honum tíma, gefa honum frið því hann er leikmaður sem Ísland þarf á að halda ef Ísland ætlar sér verðlaun á stórmóti á komandi árum.

Þráinn Orri Jónsson, lína - 2 (0 mörk - 4:29 mín.) Var geggjaður í sínum fyrsta landsleik en var óheppinn að meiðast í byrjun leiksins. Hefði verið gaman að sjá hvað hann hefði haft fram að færa gegn ógnarsterku liði Norðmanna.

Teitur Örn Einarsson, hægri skytta - spilaði of lítið

Kristján Örn Kristjánsson, hægri skytta - spilaði ekkert

Magnús Óli Magnússon, vinstri skytta - spilaði ekkert

Orri Freyr Þorkelsson, vinstra horn - spilaði ekkert

Guðmundur Guðmundsson, þjálfari - 6 Eftir erfiðan fyrri hálfleik þá fann landsliðsþjálfarinn svörin í þeim síðari. Gerði þær breytingar sem til þurfti á íslenska liðinu og í raun grátlegt að hann hafi ekki náð fimmta sæti. Frammistaða íslenska liðsins á mótinu fer hins vegar í sögubækurnar. Í fæðingu er lið sem getur komist aftur í fremstu röð í heiminum og unnið til verðlauna á stórmóti. Það er kannski ekki í höndum GUðmundar hvort hann verði áfram landsliðsþjálfari. Verði svo ekki er ljóst að hann hefur skilað góðu búi og liði sem er vel undirbúið fyrir stærri átök.