Sport

Síðustu átta dagar hafa verið Anníe Mist erfiðir

Óskar Ófeigur Jónsson skrifar
Anníe Mist Þórisdóttir með Freyju Mist sinni.
Anníe Mist Þórisdóttir með Freyju Mist sinni. Instagram/@anniethorisdottir

Anníe Mist Þórisdóttir mælir með því að sleppa því að fá kórónuveiruna en hún greindi frá því að hún og fjölskyldan hafi fengið Covid-19 í síðustu viku.

Anníe Mist fann ekki mikið fyrir kórónuveirunni en aðra sögu er að segja af manni hennar Frederik Ægidius og dóttur hennar Freyju Mist.

„Síðustu átta dagar hafa verið erfiðir. Frederik Ægidius og Freyja fengu bæði Covid. Ég var neikvæð í nokkra daga en ákvað svo auðvitað að vera bara með þeim og fá veiruna líka,“ skrifaði Anníe Mist Þórisdóttir á Instagram síðu sína.

„Af einhverjum ástæðum þá gerði ég lítið úr þeim áhrifum sem þetta gæti haft á Freyju af því að hún er ung og krakkar verða vanalega ekki fyrir miklum áhrifum. Þá voru við Frederik bæði líka þríbólusett,“ skrifaði Anníe Mist.

„Stelpan mín fór upp og niður í hita síðan á laugardaginn og var yfir í fjörutíu gráður síðustu tvær nætur. Frederik Ægidius hefur síðan verið í rúminu í viku. Ég er þakklát fyrir að hafa ekki verið með nein slæm einkenni en ég væri mikið til í að taka við öllum hennar einkennum ef ég gæti,“ skrifaði Anníe.

„Ekkert kemur mér meira úr jafnvægi en að sjá mína nánustu veikjast. Ég veit að þetta er ekki hættulegt og við munum öll ná okkur en þetta er samt ömurlegt og það er óhuggulegt þegar barnið þitt er veikt,“ skrifaði Anníe.

„Þegar fleiri takmarkanir og höft eru að falla úr gildi þá mæli ég með því að þú passir upp á þig og aðra. Ef þú færð veiruna vonandi verður það ekki slæmt fyrir þig. Þetta er kannski bara flensa en ég hef ekki haft gaman af síðustu viku og ég mæli sérstaklega með því að sleppa við þetta,“ skrifaði Anníe eins og sjá má hér fyrir neðan.




Fleiri fréttir

Sjá meira


×