Handbolti

Þráinn Orri: Ætlaði ekki að vera eins og hver annar túristi

Ingvi Þór Sæmundsson skrifar
Þráinn Orri Jónsson tekur utan um Nemanja Grbovic, línumann Svartfjallalands.
Þráinn Orri Jónsson tekur utan um Nemanja Grbovic, línumann Svartfjallalands. getty/Sanjin Strukic

Þráinn Orri Jónsson kom inn á í sínum fyrsta landsleik þegar Ísland vann Svartfjalland, 24-34, í lokaleik sínum í milliriðli I í dag. Þráinn kom til móts við íslenska liðið á sunnudaginn og sat allan tímann á bekknum í tapinu fyrir Króatíu, 22-23, á mánudaginn. En hann fékk tækifæri í dag og stóð sig vel.

„Þetta er eiginlega ólýsanleg tilfinning. Ég er búinn að bíða lengi eftir þessu tækifæri. Ég ákvað þegar ég kom út að ef ég fengi tækifæri ætlaði ég að sýna að ég ætti skilið í þessu liði. Ég ætlaði ekki að vera eins og hver annar túristi. Ég ætlaði að taka þátt af fullum krafti. Þetta er ólýsanlegt og að gera þetta svona vel í þokkabót,“ sagði Þráinn í samtali við Henry Birgi Gunnarson eftir leikinn í Búdapest í dag.

Þráinn skoraði tvö mörk í leiknum og stóð fyrir sínu í vörn íslenska liðsins. Ekki er langt síðan hann fór aftur á ferðina eftir að hafa greinst með kórónuveiruna.

„Sérstaklega í ljósi að maður hefur ekki verið inni í þessu og náði ekki mörgum æfingum með landsliðinu. Og ég held ég hafi náð tveimur æfingum með Haukum eftir að ég fékk covid,“ sagði Þráinn og skaut svo létt á fyrrverandi landsliðsmanninn Ásgeir Örn Hallgrímsson.

„Þetta eru leiðinlegustu handboltaæfingar sem ég hef farið á en þær skiluðu sér í dag. Þetta er ólýsanlegt og maður trúir því eiginlega ekki enn að maður sé mættur hingað út.“

Íslendingar þurfa núna að treysta á að Danir vinni Frakka til að komast í undanúrslit. Ef Danmörk vinnur ekki spilar Íslandi um 5. sætið á EM.

„Það verður spennandi. Því miður er það þannig. Við gerðum okkar og lítið annað sem við getum gert. En Danirnir eru með mestu breiddina. Hafa ekki lent í miklu covid-veseni og þetta er drullugott lið. Þeir eru með tvo til þrjá menn í hverri stöðu og þetta á ekki að skipta máli hverjir spila,“ sagði Þráinn að lokum.

Klippa: Þráinn Orri eftir stórsigur Íslands

Tengdar fréttir

„Ætla ekki að nota orkuna í að horfa á þennan leik“

„Ég ætla að leggjast upp í rúm og reyna að hvíla mig aðeins, og sleppa því að horfa á sjónvarpið. Ég ætla ekki að nota orkuna í að horfa á þennan leik,“ segir Guðmundur Guðmundsson landsliðsþjálfari um leik Dana og Frakka í kvöld, sem ræður því hvort Ísland kemst í undanúrslit á EM.

Elvar: Ótrúlega gaman að komast út úr herberginu

„Það er ótrúlega gaman að fá að spila aftur og komast út úr herberginu,“ sagði Elvar Örn Jónsson eftir stórsigurinn gegn Svartfjallalandi á EM, nokkrum klukkutímum eftir að hafa losnað úr einangrun vegna kórónuveirusmits.

Þrír lausir úr einangrun og Ísland stóreflist

Íslenska karlalandsliðið í handbolta hefur endurheimt öfluga leikmenn úr einangrun eftir kórónuveirusmit, á síðustu stundu fyrir leikinn mikilvæga við Svartfjallaland á eftir.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.