Hertar samkomutakmarkanir taka gildi á miðnætti í kvöld en þar er kveðið á um 20 manna samkomutakmörk, með möguleikan á 200 manna hraðprófsviðburðum. Undanþágur hafa þó verið veittar fyrir Þorláksmessutónleikum Bubba Morthens og Jólavinatónleikum Emmsjé Gauta á morgun.
Jóhannes Þór Skúlason, framkvæmdastjóri Samtaka ferðaþjónustunnar, segir undanþágurnar skjóta skökku við en samtökin hafa ítrekað óskað eftir undanþágum fyrr í faraldrinum sem hefur verið hafnað.
„Þær undanþágubeiðnir eru þó ekki sambærilegar við þessar sem nú eru veittar, það er nú rétt að halda því til haga, en minna á að okkur hefur þótt stjórnsýslan í kringum þessar undanþágur stundum hafa verið dálítið sérstök,“ segir Jóhannes.
„Varðandi þessar undanþágur sem er verið að veita núna þá sjáum við hins vegar ekki betur en svo að forsendur þeirra gildi alveg jafnt um til dæmis nokkur veitingahús,“ segir Jóhannes.
Hann bendir til að mynda á að Þorláksmessa sé sérstakur viðburður sem erfitt reynist að halda síðar. Þá sé fyrirvarinn skammur og ljóst að mörg fyrirtæki verði fyrir tekjutapi, þar á meðal veitingahús.
„Það er kannski svona það sem við erum að benda á, að ætli menn á annað borð að fara að veita undanþágur á þessum forsendum, varðandi skamman fyrirvara og annað slíkt, að þá gildir það alveg sambærilega um ýmsa aðra,“ segir Jóhannes.
Yfirvöld þurfi að gæta jafnræðis
„Það væri kannski eðlilegt að það væri tekið tillit til þess í heildinni, að menn aðlagi reglugerðina þannig að hún annað hvort taki gildi að kvöldi Þorláksmessu eða að það sé settur einhver almennur sveigjanleiki inn í hana, í stað þess að undanþágur séu veittar bara hér en ekki þar,“ segir Jóhannes.
Hann gagnrýnir einnig þá röksemdarfærslu að tónleikahald sé öruggara þar sem skráð er í sæti og fólk með grímu.
„Það hefur nú verið allur gangur á því, eins og til dæmis Bubbi Morthens hefur bent á undanfarna daga,“ segir Jóhannes og vísar þar eflaust til ummæla Bubba um tónleika Baggalúts á dögunum.
„Svo ekki síður það að þegar að 1500 manns er safnað saman í sama rýmið, þó að það sé skipt í hólf, þá eru held ég áhöld um það hvort það sé einhver minni smithætta þar heldur en þegar að fjölskyldu og vinahópar sitja saman við borð í tiltekinni fjarlægð,“ segir Jóhannes.
Hann segir ýmsa veitingastaði sem heyra undir samtökin hyggjast sækja um undanþágu fyrir morgundaginn. Einhver fyrirtæki muni sýna fram á það að beðið verði um hraðpróf og áfengisveitingar takmarkaðar.
„Ég geri ráð fyrir því að heilbrigðisráðuneytið muni, að jafnræðisreglu stjórnsýslunnar virtri, taka allar þær undanþágubeiðnir sem berist í dag, og mér heyrist að þær verði nokkrar, til afgreiðslu á þeim sömu forsendum og hinar undanþágurnar hafa verið veittar,“ segir Jóhannes.
