Fauci varar við ferðalögum um jólin og segir ómíkron ógna heilbrigðiskerfinu

Gunnar Reynir Valþórsson skrifar 20. desember 2021 07:05

Bandaríkin eru meðal þeirra ríkja þar sem menn vænta ómíkron-bylgju í janúar. AP/Susan Walsh

Anthony Fauci, sóttvarnalæknir Bandaríkjanna, varar við því að ferðalög fólks landshluta á milli yfir jólahátíðina muni verða til þess að ómíkron-afbrigði kórónuveirunnar mun dreifast mun meira um Bandaríkin en ella, jafnvel á meðal þeirra sem eru fullbólusettir.

Fauci segir alveg ljóst að þetta afbrigði hafi ótrúlega mikla getu til að smitast milli manna og bendir hann á að afbrigðið sé nú í uppsveiflu víðast hvar um heiminn. Hefur hann biðlað til fólks að láta bólusetja sig og þiggja örvunarskammt og bera grímu þegar það ferðast.

Víða hefur verið hert á sóttvarnarreglum og hefur ferðatakmörkunum verið komið á í löndum á borð við Frakkland og Þýskaland. Í Hollandi hefur fólki verið sagt að halda sig heima yfir jólin.

Fauci tekur undir með þeim sérfræðingum sem hafa bent á að þótt ómíkron-afbrigðið valdi vægari veikindum í flestum tilfellum geti hinn mikli fjöldi smitaðra sett heilbrigðiskerfi landanna úr skorðum.

Von er á minnisblaði frá Þórólfi Guðnasyni sóttvarnalækni nú með morgninum en búist er við að heilbrigðisráðherra kynni nýjar sóttvarnareglur eftir ríkisstjórnarfund á morgun.

Bandaríkin Faraldur kórónuveiru (COVID-19) Bólusetningar

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.