Innlent

Dældi fyrir milljón með annarra manna dælulyklum

Tryggvi Páll Tryggvason skrifar
Maðurinn sótti í dælulykla viðskiptavina N1.
Maðurinn sótti í dælulykla viðskiptavina N1. Vísir/Vilhelm

Karlmaður hefur verið dæmdur í hálfs árs fangelsi, skilorðsbundið til tveggja ára, fyrir þjófnað, ólögmæta meðferð fundins fjárs og fjársvik. Maðurinn notaði meðal annars dælulykla í eigu annarra til að dæla bensíni fyrir rúma milljón.

Notaði hann lyklana til að dæla bensíni fyrir rétt rúma milljón í fjölda skipta yfir nokkurra mánaða tímabil, en alls urðu sjö eigendur dælulykla fyrir barðinu á manninum.

Dælulyklarnir voru allir frá N1 og voru brotin framin við hinar ýmsu bensínstöðvar fyrirtækisins á höfuðborgarsvæðinu.

Þá var maðurinn einnig ákærður fyrir að hafa tekið peningaveski sem skilið var eftir á afgreiðsluborði verslunarinnar Nettó í Mjódd og nýtt greiðslukort sem leyndist í veskinu til að versla sér ýmsar vörur.

Manninum var einnig gefið að sök að hafa brotið fjórar rúður í bíl við Mjólkursamsöluna í Reykjavík, auk þess að hafa ekið undir áhrifum ávana- og fíkniefna í nokkur skipti.

Maðurinn var ekki viðstaddur við þingfestingu málsins og boðaði ekki forföll. Dæmdi héraðsdómur hann í sex mánaða fangelsi, sem fellur niður haldi hann skilorð í tvö ár.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×