Sport

Tengdasonur Mosfellsbæjar ætlar að endurskoða sinn leikstíl eftir skell í nótt

Óskar Ófeigur Jónsson skrifar
Patrick Mahomes var allt annað en sáttur með sjálfan sig eftir annan tapleikinn í röð hjá Kansas City Chiefs á heimavelli sínum.
Patrick Mahomes var allt annað en sáttur með sjálfan sig eftir annan tapleikinn í röð hjá Kansas City Chiefs á heimavelli sínum. AP/Ed Zurga

Patrick Mahomes og félagar í Kansas City Chiefs steinlágu á heimavelli í NFL-deildinni í nótt og besti maður liðsins axlaði ábyrgðina eftir leikinn.

Buffalo Bills vann leikinn 37-20 og hefur þar með unnið fjóra leiki í röð en á sama tíma var Chiefs liðið að tapa í þriðja sinn í fimm leikjum.

Mahomes, sem hefur viðurnefnið Tengdasonur Mosfellsbæjar hér á landi, var sjálfgagnrýninn í viðtölum eftir leikinn en liðið hefur nú tapað tveimur heimaleikjum í röð.

„Þetta byrjar allt hjá mér,“ sagði Patrick Mahomes sem kastaði boltanum tvisvar sinnum frá sér og glataði honum einu sinni á jörðinni líka.

„Þetta er eitthvað sem ég hef ekki verið vanur að gera mikið af á mínum ferli en nú þarf ég að endurskoða hvar ég er staddur og hvaða ákvarðanir ég er að taka,“ sagði Mahomes.

„Ég hef verið svolítið klikkaður leikmaður þegar kemur að skrölti og köstum en ég hef aldrei verið leikmaður sem er að kasta boltanum mikið frá mér. Nú þarf ég að endurskoða leikstílinn og hvað ég er að gera og það er ekkert annað í boði en að hætta því,“ sagði Mahomes.

Buffalo Bills komst í 31-13 í leiknum eftir að hafa stolið sendingu frá Mahomes og hlaupið með hana alla leið í markið.

Mahomes hefur þegar kastað boltanum sex sinnum frá sér á leiktíðinni en mest hefur hann kastað boltanum tólf sinnum frá sér á heilu tímabili. Hann mun bæta það met ríflega með sama áframhaldi.

Buffalo Bills náði með þessum sigri að hefna fyrir tapaði á móti Chiefs í úrslitakeppninni á síðustu leiktíð.

Það þurfti reyndar að gera meira en klukkutíma hlé á leiknum vegna þrumuveðurs og það rigndi mikið í seinni hálfleiknum.

Josh Allen, leikstjórnandi Buffalo, var frábær en hann átti þrjár snertimarkssendingar auk þess að hlaupa 62 jarda með boltann og skora eitt snertimark sjálfur.

Það var að venju mikið fjör í leikjum sunnudagsins í NFL-deildinni.

Arizona Cardinals liðið er enn ósigrað eftir 17-10 sigur á San Francisco 49ers. DeAndre Hopkins skoraði snertimarkið sem tryggði sigurinn og var líka ánægður með sig eins og sjá má hér fyrir ofan.

Green Bay Packers vann sinn fjórða sigur í röð en á dramatískan hátt. Sparkarinn Mason Crosby klikkaði á þremur vallarmörkum í röð áður en hann skoraði sigurvallarmarkið í framlengingunni í 25-22 sigri á Cincinnati Bengals.

Tom Brady og félagar í Tampa Bay Buccaneers unnu 45-17 stórsigur á Miami Dolphins þar sem Brady átti fimm snertimarkssendingar.

Jacksonville Jaguars tapaði 31-19 á móti Tennessee Titans sem þýðir að liðið hefur nú tapað tuttugu leikjum í röð.

Carolina Panthers vann þrjá fyrstu leiki sína en tapaði öðrum leiknum í röð í gær nú 21-18 á móti Philadelphia Eagles. Leikstjórnandi Eagles, Jalen Hurts, skoraði sjálfur tvö snertimörk á jörðinni í endurkomusigri og annað þeirra tryggði sigurinn.

Sparkarinn Greg Joseph tryggði Minnesota Vikings 19-17 sigur á Detroit Lions með vallarmarki í lokin en Ljónin töpuðu enn einu sinni á grátlegan hátt og hafa tapað öllum fimm leikjum tímabilsins.

Nick Folk, sparkari New England Patriots, tryggði liðinu 25-22 sigur á Houston Texans með vallarmarki undir lokin en viku áður sparkaði hann í stöngina og út þegar hann gat tryggt liðinu sigur á Tom Brady og félögum í Tampa Bay Buccaneers.

Hér fyrir neðan má sjá öll snertimörkin frá því í gær.

  • Úrslit í NFL-deildinni í gær og nótt:

  • (Heimaliðið er á eftir)

  • Chicago Bears 20-9 Las Vegas Raiders
  • Cleveland Browns 42-47 Los Angeles Chargers
  • San Francisco 49ers 10-17 Arizona Cardinals
  • New York Giants 20-44 Dallas Cowboys
  • Buffalo Bills 38-20 Kansas City Chiefs
  • New York Jets 20-27 Atlanta Falcons
  • Denver Broncos 19-27 Pittsburgh Steelers
  • New Orleans Saints 33-22 Washington
  • New England Patriots 25-22 Houston Texans
  • Miami Dolphins 17-45 Tampa Bay Buccaneers
  • Green Bay Packers 25-22 Cincinnati Bengals (Framlenging)
  • Detroit Lions 17-19 Minnesota Vikings
  • Philadelphia Eagles 21-18 Carolina Panthers
  • Tennessee Titans 37-19 Jacksonville Jaguars
NFL



Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.