Íslenski boltinn

Fjórða félagið sem vinnur langþráðan stóran titil eftir að Pablo mætir á svæðið

Óskar Ófeigur Jónsson skrifar
Pablo Punyed er hér fyrir miðju fyrir aftan Íslandsmeistarabikarinn eftir sigur Víkinga um helgina.
Pablo Punyed er hér fyrir miðju fyrir aftan Íslandsmeistarabikarinn eftir sigur Víkinga um helgina. Vísir/Hulda Margrét

Salvadorinn Pablo Punyed er mikill sigurvegari en það hefur hann sýnt og sannað ítrekað í íslenska fótboltanum. Hann varð Íslandsmeistari með Víkingum í lokaumferð Pepsi Max deild karla á laugardaginn.

Pablo Punyed varð líka þarna Íslandsmeistari með sínu þriðja félagi og þetta sumar er enn eitt dæmið um að Palbo mætir á svæðið og fljótlega enda löng bið hjá hans nýja félagi eftir titli.

Síðustu fjögur félög Pablo á Íslandi hafa öll unnið stóran titil eftir að hann fór að spila með félaginu.

Pablo spilaði fyrst á Íslandi með Fjölni árið 2012 en fyrsta tímabilið hans í efstu deild var með Fylki 2013.

Ævintýrin fóru hins vegar að gerast þegar hann samdi við Stjörnuna fyrir 2014 tímabilið. Frá árinu og með árinu hefur Pablo Punyed unnið stóran titl, Íslandsmeistaratitil eða bikarmeistaratitil, með fjórum mismunandi félögum.

Stjarnan varð Íslandsmeistari í fyrsta sinn í sögu félagsins á hans fyrsta tímabili, ÍBV vann sinn fyrsta bikar í nítján ár á hans öðru ári í Eyjum, KR varð Íslandsmeistari í fyrsta sinn í sex ár á hans öðru ári og Víkingar urðu í ár Íslandsmeistarar í fyrsta sinn í þrjá áratugi á hans fyrstu leiktíð í Víkinni.

Það fylgir líka sögunni að Stjarnan hefur ekki orðið Íslandsmeistari eftir að hann fór, ÍBV hefur ekki unnið titil síðan að hann fór og KR-ingar unnu ekki titil á sínu fyrsta tímabili án Pablo.

Sigurvegarinn Pablo Punyed:

  • Fer í Stjörnuna 2014
  • Árið 2014 verður Stjarnan Íslandsmeistari í fyrsta sinn í sögunni
  • Fer í ÍBV 2016
  • Árið 2017 verður ÍBV bikarmeistari og vinnur sinn fyrsta titil í 19 ár.
  • Fer í KR 2018
  • Árið 2019 verður KR Íslandsmeistari í fyrsta sinn í 6 ár
  • Fer í Víking 2021
  • Árið 2021 verður Víkingur Íslandsmeistari í fyrsta sinn í 30 ár



Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.