Skýrist á næstu dögum hvort stjórnarsamstarfið verði endurnýjað

Ríkisstjórnin hélt velli og vel rúmlega það eftir kosningarnar í gær en endanleg úrslit lágu fyrir um klukkan níu í morgun. Fyrir kosningar höfðu stjórnarflokkarnir þrjátíu og þrjá þingmenn eftir að tveir þingmenn Vinstri grænna höfðu yfirgefið þingflokkinn á miðju kjörtímabili. Nú eru stjórnarflokkarnir sameiginlega með þrjátíu og sjö þingmenn, tveimur fleiri en þegar stjórnarsamstarfið hófst.

Úrslitin urðu annars þessi.

Sjálfstæðisflokkurinn fékk sextán þingmenn eins og eftir síðustu kosningar, Vinstri græn misstu þrjá og eru nú með átta. En það er Framsóknarflokkurinn sem kom sá og sigraði, bætti við sig fimm þingmönnum og er nú með þrettán þingmenn.

„Auðvitað er það ein af niðurstöðum kosninganna að Framsóknarflokkurinn er enn á ný orðinn leiðandi afl í íslenskum stjórnmálum. Með sterka stöðu í öllum kjördæmdum,“ sagði Sigurður Ingi Jóhannsson formaður Framsóknarflokksins eftir að sigur flokksins var ljós í nótt.

Þetta hafi verið draumur hans frá því hann tók við formennsku í flokknum árið 2016 en þetta eru bestu úrslit Framsóknarflokksins síðan 2013.

Katrín Jakobsdóttir formaður Vinstri grænna telur ríkisstjórnina geta vel við unað.

„Það er auðvitað sérstakt afrek að þessi ríkisstjórn sem ég hef leitt í fjögur ár heldur í kosningum. Fyrsta þriggja flokka ríkisstjórnin sem klárar kjörtímabil og heldur líka. En það er hins vegar alveg ljóst að það er mismunandi hvernig flokkarnir fara út úr þessu,“ sagði Katrín á kosningavöku Stöðvar 2 í gærkvöldi.

Formenn stjórnarflokkanna hafa ekki hist formlega í dag til að fara yfir stöðuna. Nýr þingflokkur Vinstri grænna kom hins vegar saman í dag til að ráða ráðum sínum og reiknað er með að Framsóknarmenn geri það á morgun.

Annar sigurvegari kosninganna er Flokkur fólksins með sex þingmenn. Þingmönnum hans fjölgar um tvo frá síðustu kosningum. Sigurganga flokksins varð ljós strax í fyrstu tölum þegar Inga Sæland formaður flokksins mætti í sjónvarpssal hjá Stöð 2.

Ég finn það á þér að þú ert svo spennt. Má ég finna höndina á þér, ertu köld?

„Ég er sjóðandi heit. Alveg funheit, alltaf,“ sagði Inga sem ekki gat leynt gleði sinni.

„Þá er ég komin í þá stöðu að ég get virkilega farið að beita mér. Virkilega farið að stíga fram og gera það sem ég hef verið að boða og Flokkur fólksins hefur staðið fyrir,“ sagði Inga.

Aðrir stjórnarandstöðuflokkar riðu ekki feitum hesti frá kosningunum. Samfylkingin tapaði einum og fékk sex, eins og Píratar sem einnig fengu sex þingmenn. Viðreisn bætti hins vegar við sig einum þingmanni og fékk fimm kjörna.

Af flokkum sem þegar voru á þingi tapar Miðflokkurinn mestu. Hafði sjö þingmenn en fékk þrjá kjörna nú. Sósíalistaflokknum tókst síðan ekki að ná mönnum á þing þrátt fyrir ágætt gengi í skoðanakönnunum en flokkurinn fékk að lokum 4,1 prósenta fylgi.

Staðan var rædd í kvöldfréttum Stöðvar 2.