Þetta datt ekki fyrir okkur í dag

Á sama tíma og Breiðablik tapaði fyrir FH þá hafði Víkingur betur gegn KR í vesturbænum. Óskar vildi þó ekkert hugsa um þann leik í viðtali.

„Ég vil ekkert vera að hugsa um það sem er að gerast hjá KR og Víking. Ég er fyrst og fremst bara ósáttur að hafa ekki fengið neitt út úr þessum leik og það er allra helst sú tilfinning sem er að berjast í brjósti mér þessa stundina,“ byrjaði Óskari á því að segja.

Sóknarleikur Blika var ekki upp á marga fiska í fyrri hálfleiknum en í seinni hálfleiknum var sóknarleikurinn betri. Óskar vildi þó ekki meina að hann hafði lagt til einhverjar stórar breytingar.

„Nei svo sem ekki, við bara skerptum á ákveðnum hlutum og okkur fannst kannski vera smá hrollur í mönnum, eðlilega kannski, þannig við töluðum aðeins um það. Mér fannst seinni hálfleikurinn vera fínn hjá okkur og mér fannst við gera nóg til þess að fá eitthvað úr leiknum, en stundum er þetta bara svona.“

Blikar áttu dauðafæri undir lok leiks þar sem Jason Daði hitti ekki boltann fyrir opnu marki auk þess sem Árni Vilhjálmsson skaut vítaspyrnu sinni langt yfir markið. Óskar var því spurður hvort að Blikum hafi einfaldlega ekki verið ætlað að skora í dag.

„Já það gæti vel verið, ágætlega orðað hjá þér, þetta einhvern veginn datt ekki fyrir okkur í dag,“ endaði Óskar Hrafn á að segja.

Pepsi Max deild karla er á Stöð 2 Sport en upplýsingar um útsendingar má finna hér. Pepsi Max deildin er hluti af Stöð 2 Sport Ísland sem kostar 3.990 krónur á mánuði en einnig má kaupa útsendingar sem stakan viðburð á 990 krónur.