Innlent

Faldi sig inni í herbergi af ótta við Angjelin

Hallgerður Kolbrún E. Jónsdóttir og Kolbeinn Tumi Daðason skrifa
Angjelin Sterkaj hefur játað að hafa orðið Armando Baqirai að bana laugardagskvöldið 13. febrúar.
Angjelin Sterkaj hefur játað að hafa orðið Armando Baqirai að bana laugardagskvöldið 13. febrúar. Vísir

Spænskur vinur Antons Kristins Þórarinssonar segist hafa verið hræddur við Angjelin Sterkaj. Hann hefði falið sig inni í herbergi í íbúð þangað sem Angjelin mætti daginn eftir morðið, af ótta við Angjelin.

Aðalmeðferð í Rauðagerðismálinu hófst á mánudag og er reiknað með að skýrslutökum ljúki í dag. 

Fjórir eru ákærðir fyrir manndráp. Angjelin Sterkaj er sakaður um að hafa skotið Armando Beqirai til bana laugardagskvöldið 13. febrúar síðastliðinn, sem hann hefur játað en ber fyrir sig sjálfsvörn. Shpetim Qerimi, Murat Selivrada og Claudia Sofia Coelho Carvalho eru sömuleiðis ákærð hvert fyrir sinn þátt sem leiddi til þess að Armando var banað.

Meint skuld sögð tóm þvæla

Anton Kristinn, sem lýst hefur verið sem umfangsmiklum aðila í fíkniefnaheiminum hér á landi, sagði fyrir dómi í gær ekkert til í því að Armando hafði ætlað að kúga út úr honum fleiri milljónum króna. Fram kom í gögnum sem lekið var á Internetið í upphafi árs að Anton hefði verið upplýsingagjafi hjá lögreglu á sínum tíma.

Mátti merkja á Antoni í dómsal í gær að það mál tengdist ekki Rauðagerðismálinu með neinum hætti. Angjelin fullyrti á mánudag að Armando hefði ætlað að kúga fé út úr Antoni. Anton hafnar þessu og fleiri sem báru vitni í dómsal í morgun, og þekkja Anton, tóku undir með honum. Einn þeirra, vinur Armandos, sagði tóma þvælu að Armando hafi „sett skuld“ á Anton Kristinn.

Anton Kristinn blés á það að hafa fengið sterkbyggða karlmenn til Íslands snemma árs eftir að út spurðist að hann hefði verið upplýsingagjafi. Tveir menn hefðu komið frá Tenerife, vinir hans, til að starfa í byggingariðnaði. Þeir báru vitni í morgun.

Bjó í íbúð Antons Kristins

Annar vinurinn, spænskur, sagðist hafa komið til Íslands til að starfa hér. Hann hefði kynnst Antoni á Tenerife þegar Anton var þar í fríi. Anton dvelur stóran hluta ársins á Spáni hvar hann spilar meðal annars golf.

„Þegar ég kom til Íslands tók hann á móti mér,“ sagði spænski vinnurinn. Þeir hafi fengið að búa í íbúð Antons. Angjelin hafi hann lítið hitt en þeir báðir verið hluti af hópi fólks fór norður í land í snjósleðaferð vikuna fyrir manndrápið í Rauðagerði.

Vinurinn sagði ferðina hafa verið skrýtna og sérstaklega hegðun Angjelins. Angjelin hafi verið á stöðugum þeytingi norður og suður. Þannig hafi þeir keyrt saman norður í land, en Angjelin hafi keyrt aftur suður daginn eftir. Fram hefur komið að Angjelin ók í Borgarnes og svo aftur norður. 

Spánverjinn lýsti því að þeir hafi loks allir haldið saman suður á nýjan leik á laugardeginum, daginn sem Armando var skotinn til bana. Angjelin hafi tjáð honum við komuna til Reykjavíkur að hann þyrfti aftur að fara norður.

Hræddur að Angjelin sæi sig

Daginn eftir hafi hann svo heyrt af morðinu í Rauðagerði og áttað sig á því hvað hefði gerst. Þeir hafi frétt að hinn vinurinn hafi verið handtekinn. Í framhaldinu hafi hann sjálfur verið handtekinn en skömmu áður hafði hann hitt Angjelin. Þeir höfðu verið saman í íbúð hjá íslenskum vini Antons Kristins. Þar var Spánverjinn með konu íslenska vinarins og barni þeirra þegar Angjelin mætti.

Spánverjinn lýsti því að hann hefði falið sig inni í herbergi í íbúðinni á meðan Angjelin var þar. Angjelin hafi líklega verið þarna í um klukkustund.

„Ég vildi ekki að hann fyndi mig,“ sagði Spánverjinn. „Ég var hræddur við hann, vildi ekki að hann sæi mig. Ég hafði komist að þeirri niðurstöðu að Angjelin hefði eitthvað með málið að gera,“ sagði Spánverjinn.

Þá lýsti Spánverjinn fundi sem hann átti með Antoni Kristni og karlmanni sem hann taldi að gæti hafa verið Armando. Hann hefði þó átt fleiri fundi með Antoni og þéttbyggðum karlmönnum og myndi ekki náið hvenær þeir fundir fóru fram.


Tengdar fréttir

„Ég þekki þessa hluti, þetta eru ekki mann­eskjur“

Góðvinur og samstarfsmaður Armando Beqirai var harðorður í garð sakborninga í Rauðagerðismálinu svokallaða þegar hann bar vitni fyrir Héraðsdómi Reykjavíkur í dag. Hann sagði sakborningana fjóra ekki manneskjur heldur hluti.

Anton Kristinn segir ekkert til í fullyrðingu um 50 milljóna króna sekt

Anton Kristinn Þórarinsson segir ekki eiga við rök að styðjast að aðilar í undirheimum hafi ætlað að sekta hann um tugi milljóna króna. Hann þvertekur fyrir að hafa vitað af fyrirætlunum Angjelin Sterkaj um að gera Armando Beqirai mein. Hefði hann vitað það hefði hann tekið fyrir það. 

Óku 300 kílómetra norður í land með föt og bíl fyrir Angjelin og Claudiu

Rúmenskt par sem bjó við hliðina á Angjelin Sterkaj og Claudiu Sofiu Coelho Carvalho í Brautarholti 4 segja að Angjelin Sterkaj hafi oft verið með skotvopn heima hjá sér. Parið ók norður í land með bíl og föt fyrir Angjelin og Claudiu eftir að Armando Beqirai var ráðinn bani í Rauðagerði rétt fyrir miðnætti laugardagskvöldið 13. febrúar.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.