Innlent

Þór­hildur lýsir kvöldinu af­drifa­ríka á B5: „Ég hef aldrei verið jafn hrædd um líf mitt“

Eiður Þór Árnason og Ingvi Þór Sæmundsson skrifa
Þórhildur Gyða Arnarsdóttir greindi fyrst frá málinu í lok ágúst. Skömmu síðar hafði formaður og stjórn KSÍ sagt starfi sínu lausu. 
Þórhildur Gyða Arnarsdóttir greindi fyrst frá málinu í lok ágúst. Skömmu síðar hafði formaður og stjórn KSÍ sagt starfi sínu lausu.  Skjáskot

Þórhildur Gyða Arnarsdóttir, sem greindi frá ofbeldi og grófri kynferðislegri áreitni af hálfu Kolbeins Sigþórssonar, landsliðsmanns í knattspyrnu, segir að hún hafi óttast um líf sitt þegar Kolbeinn tók hana hálstaki á skemmtistaðnum B5.

Þórhildur er nýjasti gestur Eddu Falak og Kolbrúnar Birnu Hallgrímsdóttur í hlaðvarpinu Eigin Konur. Þar ræðir hún upplifun sína af þessu afdrifaríka kvöldi í september árið 2017 og hvað tók við þegar málið hristi verulega upp í íslensku fótboltahreyfingunni.

„Ég var bara að tala við vinkonu mína, svo kveð ég hana, stend upp og er að fara frá flöskuborðinu og þá allt í einu er ég bara með hendi í klofinu. Fyrstu viðbrögð eru alltaf að frjósa. Ég var bara „oh my god“ hvað er í gangi? 

Þá situr hann þarna og horfir á mig. Hann sleppti ekkert og ég vissi ekkert hvað ég átti að gera. Mig minnir að ég hafi sagt: „Væri þér sama?“ eða eitthvað svona. Hann sagði „Hvað ætlarðu að gera í þessu“ og ég sagði bara „ha?“

Fullyrti að hann ætti staðinn

Þórhildur starfaði á bar í þrjú ár og segir það vera sorglega staðreynd að hún geti ekki talið hversu oft hún hafi verið áreitt, bæði í vinnunni og á djamminu.

„Ég pældi þannig séð ekkert í þessu." Eftir þetta hafi hún farið frá Kolbeini og reynt að leiða þetta hjá sér. 

„Síðan er ég úti í portinu niðri á bakvið B5 og er að labba aftur inn þegar ég heyri ótrúlega mikil læti. Þá var hann þar og portið virkaði þannig að ef þú lokaðir hurðinni þá varstu læstur úti. 

Hann var búinn að segja við mig að hann ætti staðinn og eitthvað svoleiðis og þess vegna gæti ég ekkert gert í þessu með höndina í klofinu,“ segir Þórhildur. Andri Sigþórsson, bróðir Kolbeins og umboðsmaður, var á meðal eigenda B5 á þessum tíma en ekki Kolbeinn.

„Ég spurði: „Veistu þá ekki að þú átt ekki að loka þessari hurð?“ Þá fékk ég alls konar ljót orð yfir mig. 

Ég svaraði aðeins fyrir mig og segi: „Manstu ekki eftir andlitum, bara píkum?“ og þá brjálaðist hann.“ Þegar hún gekk út úr portinu segist Þórhildur hafa gengið fyrir Kolbein sem hafi tekið hana hálstaki.

„Allt í einu var ég í chokehold og fraus algjörlega. Ég vissi ekkert hvað ég átti að gera. Fyrir tilviljun labbaði strákur út af klósettinu beint fyrir framan. 

Hann losar aðeins um mig þannig að ég náði að gefa honum olnbogaskot og taka sprettinn upp á aðra hæð inn á Búlluna og á starfsmannasvæði. Ég barði á hurðina og ég man að það fyrsta sem ég sagði: „Kolbeinn Sigþórsson er að drepa mig.“ Ég hef aldrei verið jafn hrædd um líf mitt.“

Hlusta má á viðtalið við Þórhildi Gyðu í heild sinni í spilaranum hér fyrir neðan.

Steig fram eftir að formaður KSÍ sagðist ekki kannast við kynferðisbrotamál

Þórhildur Gyða kærði málið til lögreglu sem lauk með því að kæran var felld niður og Kolbeinn greiddi henni miskabætur. Taldi Þórhildur málinu vera lokið af hennar hálfu þar til Guðni Bergsson, þáverandi formaður KSÍ, kom fram í Kastljósi þann 26. ágúst og sagði að engin kvörtun eða tilkynning um kynferðisbrot hafi komið inn á borð sambandsins.

Degi síðar steig Þórhildur fram og greindi frá máli ónefnds landsliðsmanns í knattspyrnu sem hafi verið á vitorði Guðna. Formaðurinn sagðist þá hafa misminnt og talið að ofbeldismálið væri ekki af kynferðislegum toga. Síðar kom í ljós að knattspyrnumaðurinn sem um ræðir var Kolbeinn Sigþórsson.

Neitaði sök 

Í yfirlýsingu sem Kolbeinn sendi frá sér 1. september segist Kolbeinn ekki kannast við að hafa áreitt Þórhildi Gyðu eða vinkonu hennar þetta sama kvöld.

„Hegðun mín var hins vegar ekki til fyrirmyndar og baðst ég afsökunar á henni. Ég iðraðist og tók á því ábyrgð og var tilbúnin að leita sátta.“

Þá sagðist Kolbeinn hafa greitt Þórhildi og vinkonu hennar sáttagreiðslu auk þess að hafa greitt Stígamótum þrjár milljónir króna. 

Í kjölfar yfirlýsingarinnar sagðist Þórhildur harma að hann væri að ráðast á sig og saka hana um lygar.

„Ég lýsti því bara sem átti sér stað svo fólk gerði sér grein fyrir alvarleikanum. Ástæðan var aldrei að fara á eftir honum persónulega, heldur til að varpa ljósi á að KSÍ væri að ljúga, það var það sem ég einblíndi á.“

Vinkonan greindi frá máli sínu þegar henni misbauð viðbrögð Kolbeins

Daginn eftir að Kolbeinn sendi út yfirlýsingu sína steig Jóhanna Helga Jensdóttir fram í kvöldfréttum Stöðvar 2 og tók undir frásögn Þórhildar Gyðu af því sem gerðist á B5. 

Jóhanna var í áðurnefndu starfsmannarými þetta sama kvöld og steig inn í þegar Þórhildur leitaði aðstoðar. 

„Þá verður hann virkilega reiður, grípur í mig og dregur til hliðar og segir alls konar hluti. Ógnar mér mjög mikið og ætlar að slá til mín og þá er stigið inn í,“ sagði Jóhanna um Kolbein.

Jóhanna er vinkonan sem minnst er á í yfirlýsingu hans og fékk sömuleiðis greiddar bætur frá landsliðsmanninum eftir að hafa kært málið til lögreglu. 

Fréttin hefur verið uppfærð.


Tengdar fréttir

„Ég er að varpa ljósi á sannleikann“

Sigurður G. Guðjónsson hæstaréttarlögmaður segist vera að varpa ljósi á sannleikann með umdeildri Facebook-færslu þar sem hann birti brot úr skýrslutöku yfir þolanda í ofbeldismáli. Starfsfólk Stígamóta sé farið að velja leikmenn í íslenska landsliðið. Ef almenningur sé hættur að treysta yfirvöldum þá sé samfélagið komið á mjög slæman stað.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.