Umsvifamesti miðlari grófs barnaníðsefnis dæmdur í 27 ára fangelsi

Hólmfríður Gísladóttir skrifar 16. september 2021 07:52

Marques yfirgefur dómhús á Írlandi eftir að bandarísk yfirvöld kröfðust framsals. Getty/Niall Carson

Eric Eoin Marques, 36 ára, hefur verið dæmdur í 27 ára fangelsi í Bandaríkjunum fyrir að setja upp og reka vefþjóna sem hýstu 8,5 milljónir mynda og myndskeiða af barnaníð. Þarlend yfirvöld segja Marques umsvifamesta miðlara barnakláms sem sögur fara af.

Marques, sem er með tvöfalt ríkisfang, bæði á Írlandi og í Bandaríkjunum, var handtekinn á Írlandi árið 2013 og framseldur til Bandaríkjanna árið 2019.

Hann rak vefþjóna á djúpvefnum þar sem notendur gátu nálgast afar gróft barnaníðsefni, meðal annars myndir og myndskeið af nauðgun og pyntingum ungbarna.

Yfirvöld sögðu mikið af efninu vera að koma fyrir augu þeirra í fyrsta sinn, sem þýðir að það hafði ekki verið flaggað og sett í gagnabanka sem notaðir eru til að bera kennsl á barnaníðsefni á netinu.

Þegar hann kvað upp dóminn líkti dómarinn Theodore Chuang Marques við fíkniefnabarón og sagði glæpi hans „viðurstyggilega“. Marques bað fórnarlömb ofbeldisins fyrirgefningar og biðlaði um annað tækifæri.

Saksóknarinn í málinu sagði Marques hafa skapað samfélag á netinu þar sem barnaníðingar gátu misþyrmt börnum og deilt hryllingnum með öðrum níðingum. „Þeir hópuðu sig saman og misnotuðu börn kynferðislega,“ sagði Ralph Paradiso. „Og þeir höfðu ánægju af misnotkuninni.“

Bandaríkin Kynferðisofbeldi Ofbeldi gegn börnum

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.