Reyndi að stöðva slagsmál í bænum en var skorinn

Samúel Karl Ólason skrifar 12. september 2021 07:15

Lögregluþjónar að störfum í miðbænum. Myndin tengist fréttinni ekki beint. Vísir/Kolbeinn Tumi

Lögreglunni barst í nótt tilkynning um líkamsárás í miðbænum þar sem maður hlaut áverka á hendi eftir eggvopn. Í dagbók lögreglu segir að maðurinn sagðist hafa fengið áverkana við að stöðva slagsmál tveggja manna sem hann þekkti ekki.

Maðurinn hljóp á brott og hafði samband við lögreglu.

Á milli fimm í gær og fimm í morgun eru alls 113 mál skráð hjá Lögreglunni á höfuðborgarsvæðinu. Flest þeirra sneru að hávaða og ölvun.

Tveir menn voru handteknir á sjötta tímanum í gær fyrir brot á lögreglusamþykkt. Þeir voru ölvaðir og grunaðir um hnupl úr verslun. Mennirnir voru vistaðir í fangageymslum vegna ástands þeirra og rannsóknar lögreglu.

Á svipuðum tíma var tilkynnt um umferðarslys í Hafnarfirði en þar hafði bíl verið ekið á umferðarljós. Í dagbók lögreglu segir að ökumaðurinn hafi verið kona frá Færeyjum og sagðist hún óvön því að aka um stór gatnamót með margar akreinar eins og á Íslandi. Engan sakaði í óhappinu.

Á tíunda tímanum var ökumaður stöðvaður í Árbænum. Hann er grunaður um hafa valdið umferðarslysi, akstur undir áhrifum fíkniefna eða lyfja og akstur án réttinda en hann hafði áður verið sviptur þeim.

Nokkrir aðrir ökumenn voru stöðvaðir vegna aksturs undir áhrifum áfengis og/eða fíkniefna og minnst tveir voru án ökuréttinda.

Lögreglumál Næturlíf Reykjavík

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.