Innlent

Skyndifundur í Skaftártungu af ótta við þjóðgarðsstækkun

Kristján Már Unnarsson skrifar
Félagsheimilið Tungusel í Skaftártungu í gærkvöldi.
Félagsheimilið Tungusel í Skaftártungu í gærkvöldi. Egill Aðalsteinsson

Bændur í Skaftártungu og Álftaveri fjölmenntu til skyndifundar í gærkvöldi af ótta við að umhverfisráðherra hyggist fyrir komandi kosningar stækka Vatnajökulsþjóðgarð yfir afréttarlönd þeirra í Skaftárhreppi. Þeir krefjast þess að málinu verði frestað.

Í fréttum Stöðvar 2 mátti sjá bílamergðina fyrir utan félagsheimilið Tungusel í gærkvöldi. Miðað við hana mætti ætla að mætt hafi verið nánast frá hverjum einasta sveitabæ í Álftaveri og Skaftártungu. 

Úr hópi frambjóðenda á fundinum mátti sjá Sigurð Inga Jóhannsson frá Framsóknarflokknum, Guðrúnu Hafsteinsdóttur og Jón Gunnarsson frá Sjálfstæðisflokknum, og Heiðu Guðnýju Ásgeirsdóttur frá Vinstri grænum, en hún er jafnframt bóndi í Skaftártungu. Samkvæmt upplýsingum fréttastofu var Heiða Guðný sú eina úr hópi bænda á fundinum sem lýsti yfir stuðningi við stækkun þjóðgarðsins.Egill Aðalsteinsson

Fundurinn var einkum ætlaður heimamönnum en athygli vakti að frambjóðendur mættu einnig, þeirra á meðal Sigurður Ingi Jóhannsson, formaður Framsóknarflokksins.

Að sögn eins fundarmanna boðuðu afréttarnefndir sveitanna til fundarins í skyndi í fyrradag eftir að sveitarstjórn auglýsti óvænt íbúafund um málið, sem fram á að fara á Kirkjubæjarklaustri í kvöld.

Tillagan gerir ráð fyrir að Vatnajökulsþjóðgarður verði stækkaður til suðvesturs.Grafík/Ragnar Visage

Spurst hafi út að umhverfisráðherra hyggist fyrir komandi þingkosningar, með stuðningi oddvita, stækka Vatnajökulsþjóðgarð yfir afréttarlönd bænda. Segir viðmælandi fréttastofu að aðgerðinni sé augljóslega ætlað að vera einskonar sárabót fyrir að frumvarp um hálendisþjóðgarð varð ekki að lögum.

Páll Eggertsson, bóndi á Mýrum í Álftaveri.Arnar Halldórsson

Páll Eggertsson á Mýrum, formaður afréttarnefndar Álftavers og einn fundarboðenda, nefnir sem dæmi að bændur hafi um árabil stundað uppgræðslu á afréttinum. Hann spyr hvort slíkt verði áfram leyft, ef svæðið verður gert að þjóðgarði. Hann segir það almenna kröfu bænda í sveitunum að málinu verði frestað.

Eva Björk Harðardóttir, oddviti Skaftárhrepps.Einar Árnason

Eva Björk Harðardóttir, oddviti Skaftárhrepps, staðfestir að stefnt sé að því að klára málið fyrir kosningar. Umhverfisráðuneytið hafi boðið bæði föst stöðugildi og sumarstörf sem og ákveðna uppbyggingu, sem skipti máli fyrir lítið sveitarfélag. Þetta sé tækifæri sem gefist núna og hún telji mikilvægt að grípa það fyrir kosningar. Eva telur áhyggjur bænda óþarfar og segir að engin breyting verði á þeirra stöðu.

Fundurinn á Kirkjubæjarklaustri í kvöld um stækkun Vatnajökulsþjóðgarðs er haldinn í Kirkjuhvoli og hefst klukkan 20. Starfsmaður frá Umhverfisráðuneytinu mætir og kynnir tillöguna.

Hér má sjá frétt Stöðvar 2:

Skaftárhreppur Hálendisþjóðgarður Vatnajökulsþjóðgarður Umhverfismál Landbúnaður Skipulag Þjóðgarðar

Tengdar fréttir

Lagt til að vísa hálendisþjóðgarði aftur til ríkisstjórnar

Áform um stofnun miðhálendisþjóðgarðs á kjörtímabilinu virðast endanlega fallin niður þar sem meirihluti umhverfis- og samgöngunefndar hefur lagt til að málinu verði vísað aftur til ríkisstjórnarinnar. Rammaáætlun mun líklega einnig daga uppi í nefnd að sögn þingflokksformanns Viðreisnar.

Umræða um hálendisþjóðgarð þarfnist lengri tíma

Umræða um stofnun hálendisþjóðgarðs þarfnast lengri tíma að sögn Þórdísar Kolbrúnar Reykfjörð Gylfadóttur, ferðamála-, iðnaðar- og nýsköpunarráðherra. „Það er mín persónulega skoðun að mér fyndist allt í lagi að hugsa, í ljósi umræðu um málið, hvort það sé möguleiki að taka fleiri skref en smærri,“ sagði Þórdís aðspurð um stöðu málsins í óundirbúnum fyrirspurnartíma á Alþingi í dag.

Telja Alþingi hafa brugðist með hálendisþjóðgarð

Náttúruverndarsamtökin Landvernd saka Alþingi um að hafa brugðist nú þegar tillaga liggur fyrir um að vísa frumvarpi um hálendisþjóðgarð aftur til ríkisstjórnarinnar. Komið hafi verið í veg fyrir að mikilvægur áfangi í íslenskri náttúruvernd næðist.

Sigurður Ingi segir sam­tal um Há­lendis­þjóð­garð hafa mis­tekist

Sigurður Ingi Jóhannsson, formaður Framsóknarflokksins og samgöngu- og sveitarstjórnarráðherra, segir að „samtalið“ um Hálendisþjóðgarð hafa mistekist. Ekki hafi náðst að vinna málinu brautargengi meðal íbúa í sveitum – fólks sem sé margt gjörkunnugt aðstæðum á hálendinu og nýtir auðlindir þess með sjálfbærum hætti.

Uggandi vegna hugmynda um þjóðgarð

Þórir Garðarsson, framkvæmdastjóri GrayLine og stjórnarformaður Hveravallafélagsins, er mjög ósáttur við hugmyndir umhverfisráðherra um miðhálendisþjóðgarð.

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið