Innlent

Verði aldrei þannig að þolandi mæti fyrir stjórn KSÍ

Hallgerður Kolbrún E. Jónsdóttir og Elísabet Inga Sigurðardóttir skrifa
Kolbrún Hrund Sigurgeirsdóttir, verkefnastýra Jafnréttisskóla Reykjavíkurborgar.
Kolbrún Hrund Sigurgeirsdóttir, verkefnastýra Jafnréttisskóla Reykjavíkurborgar. Vísir/Egill

Ástæða þess að stjórn Knattspyrnusambands Íslands ákvað að taka Kolbein Sigþórsson úr landsliðshópi Íslands er ofbeldismál sem skekið hefur knattspyrnuhreyfinguna undanfarna daga. Þetta herma heimildir fréttastofu.

Rúnar Már Sigurjónsson dró sig sjálfur úr hópnum. Hlutverk nýs starfshóps verður að tryggja að brugðist verði við öllum ábendingum um ofbeldi sem komi á borð sambandsins.

Guðni Bergsson sagði í gær af sér sem formaður KSÍ eftir gagnrýni á viðbrögð hans við upplýsingum um ofbeldismál leikmanna landsliðsins. Tvær breytingar verða á landsliðinu fyrir leik liðsins á fimmtudag. Kolbeinn Sigþórsson og Rúnar Már Sigurjónsson munu ekki tilheyra hópnum en samkvæmt heimildum Vísis er Kolbeinn leikmaðurinn sem greiddi Þórhildi Gyðu Arnarsdóttur miskabætur eftir að hafa gengist við ofbeldisbroti haustið 2017 og var honum gert að yfirgefa hópinn. Rúnar Már dró sig sjálfur úr hópnum.

Sérstakur starfshópur settur á laggirnar

Stjórn KSÍ hefur ákveðið að stofna starfshóp sem mun vinna að jafnréttismálum. Kolbrún Hrund Sigurgeirsdóttir, verkefnastýra jafnréttismála á skóla- og frístundasviði Reykjavíkur leiðir hópinn og mun það koma í hennar hlut að velja fólk í hann.

Hún segir að hann verði skipaður fagfólki á sviði jafnréttismála, kynferðisbrotamála og lögfræðingi ásamt fulltrúa íþróttahreyfingarinnar. Hlutverk hópsins verður að rýna í stöðuna og skoða hvar skerpa megi á verkferlum.

„Hvernig getum við komið því betur að það sé eftirfylgd með málunum og tryggt að mál geti ekki „slædað“ eða verið leyst í leynd. Við þurfum að tryggja að það sé brugðist við öllum málum,“ segir Kolbrún Hrund.

Stærsta verkefnið að finna hvar mörkin liggi

Hún segir stærsta verkefni hópsins að finna hvar mörkin liggi.

„En við þurfum líka og ég held kannski að stærsta verkefni hópsins sé að finna hvar eru mörkin. Við hvað ætlum við að miða, hvað þarf til til þess að við fjarlægjum fólk úr landsliðinu eða félagsliðinu? Hversu stórt þarf brot að vera? Hver þarf tilkynningin að vera? Á hvaða „leveli“ er þetta? Af því við getum ekki verið með óljóst kerfi þar sem við bregðumst við af tilfinningu af því að einhver sagði eitthvað,“ segir Kolbrún.

Stjórn KSÍ hafi heitið því að hlusta á hópinn.

„Við þurfum bara að setja upp verklagið sem síðan þarf að vinna eftir. Svo kannski verður niðurstaðan sú að starfshópurinn leggur til að ráðin verði inn manneskja sem mun sinna þessum málum. Það gæti vel farið svo.“

Stjórn KSÍ sendi frá sér yfirlýsingu í gær þar sem sambandið viðurkennir mistök. Stjórnin hvetur þolendur eða þá sem hafa vitneskju um alvarlegt ofbeldi innan hreyfingarinnar til þess að leita til sambandsins. Kolbrún segir að þolendur muni ekki þurfa að koma fyrir stjórnina heldur muni slík mál fara í gegnum hóp Kolbrúnar og samskiptaráðgjafa íþrótta- og æskulýðsmála.

„Það verður aldrei þannig að þolandi verði látinn standa fyrir framan alla stjórnina það kemur aldrei til,“ sagði Kolbrún Hrund Sigurgeirsdóttir.


Tengdar fréttir

Ingó tróð upp í fimm­tugs­af­mæli stjórnar­manns KSÍ

Tónlistarmaðurinn Ingólfur Þórarinsson, betur þekktur sem Ingó veðurguð, tróð upp í fimmtugsafmæli Tómasar Þóroddssonar stjórnarmanns KSÍ fyrir tíu dögum síðan. Tómas er einn þeirra sem skrifaði undir yfirlýsingu stjórnar KSÍ um að staðið sé með þolendum ofbeldis.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.