Varaði við „þjóðernis-bólusetningarstefnu“

Heimir Már Pétursson skrifar 24. ágúst 2021 07:34

Tedros Adhanom Ghebreyesus ræddi við ráðamenn í Ungverjalandi í gær. epa/Balazs Mohai

Tedros Adhanom Ghebreyesus, aðalframkvæmdastjóri Alþjóðaheilbrigðisstofnunarinnar, varaði við þjóðernis-bólusetningastefnu og óréttlæti í bólusetningum á fundi með utanríkisráðherra Ungverjalands í gær.

Ungverjar voru fyrstir ríkja Evrópusambandsins til að bjóða þegnum sínum örvunarskammt gegn kórónuveirunni og eiga um átta milljónir bóluefnaskammta á lager. Tæplega 190 þúsund Ungverjar hafa þegar fengið örvunarskammt.

Á fréttamannafundi með Peter Szijjarto, utanríkisráðherra Ungverjalands, í gær kallaði Tedros eftir tveggja mánaða hléi á örvunarskömmtum hjá ríkari þjóðum heims og þau sýndu fátækari þjóðum meiri samstöðu til að hægt verði að koma meira bóluefni til þeirra.

Hann lýsti vonbrigðum yfr því hvað lítið hefði verið gefið af bóluefnum til fátækari ríkja, sem mörg hver berðust í bökkum með að bólusetja þegna sína með fyrstu skammtinum. Af 4,8 milljörðum skammta bóluefna sem dreift hefði verið í heiminum hefðu 75 prósent farið til tíu ríkja en aðeins 2 prósent til ríkja í Afríku.

Ísland er í hópi þeirra ríkja sem byrjað hafa að gefa þegnum sínum örvunarskammt gegn Covid-19.

Faraldur kórónuveiru (COVID-19) Ungverjaland Bólusetningar

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.