Lífið

Reykjavíkurmaraþoninu frestað til 18. september

Kolbeinn Tumi Daðason skrifar
Reykjavíkurmaraþonininu hefur verið frestað um fjórar vikur. Hér slær hlaupari í gegn í hlaupinu 2018.
Reykjavíkurmaraþonininu hefur verið frestað um fjórar vikur. Hér slær hlaupari í gegn í hlaupinu 2018. Vísir/Vilhelm

Íþróttabandalag Reykjavíkur hefur tekið þá ákvörðun að fresta Reykjavíkurmaraþoni Íslandsbanka um fjórar vikur. Stefnt er á að halda það laugardaginn 18. september.

Í tilkynningu frá ÍBR, sem skipuleggur viðburðinn, segir að undirbúningur hafi staðið yfir í marga mánuði. 

„Vegna óvissu um hvaða næstu skref verða tekin varðandi samkomutakmarkanir þá sjáum við okkur ekki fært að halda viðburðinn þann 21. ágúst og verður því Reykjavíkurmaraþoni Íslandsbanka frestað til 18. september 2021. Markmið okkar er að gera sem flestum kleift að taka þátt en um leið gæta að öllum sóttvörnum.“

Mikilvægur þáttur Reykjavíkurmaraþons Íslandsbanka er Hlaupastyrkur, þar sem þátttakendur safna fyrir góðgerðarfélög á Íslandi. 

„Árið 2019 var sett áheitamet þar sem hlauparar söfnuðu 167.483.404 krónum til 181 góðgerðarfélaga. Í fyrra þegar hlaupinu var aflýst þá safnaðist 72.658.607 krónur til 159 góðgerðarfélaga. Það myndi verða þungt högg fyrir safnanir félaganna ef viðburðinum yrði aflýst annað árið í röð og af þeim sökum verður honum frestað í þeirri von að ástandið batni.“

Mörg góðgerðarfélög stóli á hlaupastyrk og því vilji ÍBR hvetja sem flesta til að hlaupa og safna, eða styrkja aðra hlaupara.

„Við viljum ekki aflýsa viðburðinum því við vitum að áheitasöfnun hlaupsins skiptir mjög miklu máli fyrir góðgerðarfélögin sem safna miklum fjármunum í gegnum Hlaupastyrk.is og vonumst við eftir góðri þátttöku í söfnuninni,“ segir Frímann Ari Ferdinandsson, framkvæmdastjóri ÍBR.

„Nú styttist í að skólahald og skipulagt íþróttastarf hefjist og því að var tekin ákvörðun um að fresta Reykjavíkurmaraþoni Íslandsbanka um mánuð vegna óvissu um næstu skref aðgerða vegna faraldursins.”

Fréttin hefur verið uppfærð.






Fleiri fréttir

Sjá meira


×