Anton Sveinn langt frá markmiði sínu og komst ekki í undanúrslit

Anton Sveinn kom í mark á 2:11,64 mín. í 200 metra bringusundi og varð annar í sínum riðli en hann var í riðli tvö af fimm.

Þetta var ekki nógu góður tími til að tryggja honum sæti í undanúrslitasundinu því Anton endaði í 24. sæti í undanrásunum. Sextán efstu komust áfram og Anton hefði þurft að synda á 2:09.95 mín. til að komast þangað eða undir Íslandsmeti sínu.

Anton Sveinn leit vel út í byrjun en virtist hreinlega springa í seinni hluta sundsins. Hann synti á 1:02 mín. fyrstu hundrað metrana en þá seinni hundrað á aðeins 1:09 mín.

Anton var með skráðan tíma 2:10,32 mín. en Íslandsmetið hans frá 2015 er 02:10,21 mín. Hann ætlaði sér að synda á 2:07 en var langt frá því markmiði sínu.

Denis Petrashov frá Kirgistan vann riðilinn en hann var 1.57 á undan Antoni í lokin. Anton var aftur á móti fyrstur í riðlinum þegar sundið var hálfnað.

Þetta sund þýðir að þátttöku Antons á þessum Ólympíuleikum er lokið en hann ákvað að taka ekki þátt í 100 metra bringusundi til að einbeita sér að sinni bestu grein.

Þetta voru þriðju Ólympíuleikar Antons, en hann keppti fyrst í London 2012 og síðan í Ríó 2016 þar sem hann var aðeins hársbreidd frá því að komast í undanúrslit í 200 metra bringusundi.