Innlent

Ummæli þeirra fimm sem Ingó krefur um bætur

Snorri Másson skrifar
Ingólfur Þórarinsson krefst miskabóta vegna ærumeiðandi ummæla um sig á netinu.
Ingólfur Þórarinsson krefst miskabóta vegna ærumeiðandi ummæla um sig á netinu. Stöð 2

Fimm einstaklingar eiga von á kröfubréfi frá Ingólfi Þórarinssyni tónlistarmanni vegna ærumeiðandi ummæla á internetinu. Lögmaður hans Vilhjálmur H. Vilhjálmsson gaf það út í viðtali í gær að þar væru viðkomandi einstaklingar krafðir um að draga ummæli sín til baka, biðjast afsökunar og greiða Ingó miskabætur.

Þetta eru Edda Falak áhrifavaldur, Sindri Þór Sigríðarson Hilmarsson viðskiptafræðingur, markaðsstjóri, baráttumaður og fyrrverandi framkvæmdastjóri Pírata, Ólöf Tara Harðardóttir, einn forsvarsmaður aðgerðahópsins Öfga, Kristlín Dís Ingilínardóttir blaðamaður á Fréttablaðinu og Erla Dóra Magnúsdóttir, blaðamaður á DV.

Enn er ekki ljóst fyrir hvaða ummæli Ingó er að krefjast bóta, en ákveðin ummæli frá umræddum einstaklingum koma sterklegar til greina en önnur. Samkvæmt upplýsingum fréttastofu hafa bréfin verið póstlögð en ekki enn borist viðtakendum.

Ummæli í fjölmiðlum

Tveir blaðamenn eru á meðal þeirra sem eiga von á kröfubréfi, Kristlín Dís Ingilínardóttir á Fréttablaðinu og Erla Dóra Magnúsdóttir á DV. 

Bæði blöðin eru í eigu útgáfufélagsins Torgs og blaðamennirnir eiga það sameiginlegt að hafa dregið þá ályktun að Ingó hafi verið sá nafnlausi tónlistarmaður sem ræddi um í TikTok-myndbandi aðgerðahópsins Öfga.

@ofgarofgar

Jesús allir lúserar landsins mættir að fella kónginn. öfgar #islenskt #islenskttiktok

♬ Get You The Moon - Timmies

Kristlín Dís skrifaði grein á vef Fréttablaðsins 3. júlí: „Tugir sagna lýsa of­beldi af hálfu Ingó Veður­guðs.“ Þar skrifaði hún að ætla mætti að sögurnar sem Öfgar hefðu birt um ónefndan tónlistarmann væru um Ingó Veðurguð. Þannig nafngreindi hún tónlistarmanninn án þess að aðgerðahópurinn hafi gengið svo langt.

Kristlín Dís segir í samtali við Vísi að kröfubréfið hafi ekki enn borist henni, en hún er þó ekki heima við. „Ég er bara á Seyðisfirði en ég bíð spennt eftir að fá bréf,“ segir Kristlín. „Mamma sakaði mig líka um að vera hræðilega dóttur af því að ég sagði henni ekki frá þessu í gær, en ég sá þetta bara á Vísi í morgun.“

Erla Dóra skrifaði grein í DV sama dag: „Tuttugu nafnlausar sögur birtar um meinta ofbeldishegðun Ingó Veðurguðs – Ingó neitar sök.“ Þar segir að í myndbandi Öfga komi fram „tuttugu nafnlausar sögur um meinta ofbeldishegðun Ingólfs.“

Kristlín Dís Ingilínardóttir og Edda Falak eru á meðal þeirra sem Ingó Veðurguð krefur um miskabætur vegna ærumeiðandi ummæla.Samsett mynd

Erla Dóra segir í samtali við Vísi að henni hafi enn ekki borist kröfubréfið. Hún muni ekki taka afstöðu til málsins fyrr en hún veit um hvað það snýst.

Þess er að geta í þessu samhengi að Tanja Ísfjörð, sem er félagi í aðgerðahópnum, hafði óskað eftir „staðfestum sögum af ákveðnum Veðurguð“ á Twitter í aðdraganda þess að myndbandið var búið til. Það gaf til kynna að Ingó væri til umræðu í lokaafurðinni. Í viðtali við Vísi sama dag vísaði Ingó þessum ásökunum öllum á bug.

Ummæli á samfélagsmiðlum

Edda Falak er í Fréttablaðinu í dag sögð hafa fengið kröfubréf frá Ingó vegna þess að hún hafi lýst því yfir á Twitter að „þekktur tónlistarmaður hafi nauðgað sér.“ Hún hefur einnig sagt frá nauðgun þegar hún var 17 ára í viðtali í Dagmálum Morgunblaðsins. Edda hefur ekki svarað Vísi.

Sindri Þór Hilmarsson Sigríðarson virðist samkvæmt þessu tísti hafa gert ráð fyrir að vera kærður fyrir meiðyrði vegna ummæla sem hann skrifaði í athugasemdakerfi Vísis við grein um Ingó Veðurguð.

Sindri talaði þar um mann „sem er svo þekktur fyrir að ríða börnum að það hefur verið óskrifuð og jafnvel skrifuð regla félagsmiðstöðva víðsvegar um landið í áratug að ráða hann ekki á skemmtanir.“ Hann hélt áfram: „Hvað finnst þér réttlætanlegt að fullorðinn maður nýti frægð sína og valdastöðu til að ríða mörgum börnum áður en það verður óásættanlegt að ráða hann sem skemmtikraft á útihátíð?“

Sindri hefur ekki svarað Vísi.

Ólöf Tara Harðardóttir er á meðal þeirra sem stóðu að gerð myndbandsins á TikTok á vegum aðgerðahópsins. Ekki liggur fyrir hvaða ummæli hún hefur látið falla sem kalla á kröfubréfið en hún hefur tjáð sig mikið um nýjustu bylgju af MeToo á Twitter, og hefur einnig fjallað um málefni Ingó í hlaðvarpsviðtölum.

Ólöf Tara segir í samtali við Vísi að henni hafi enn ekki borist bréfið og getur því ekki veitt upplýsingar um innihald þess.

Aðgerðahópurinn Öfgar var til viðtals í Karlmennskunni á dögunum. Til vinstri er Hulda Hrund Sigmundsdóttir en til hægri Ólöf Tara Harðardóttir, sem er krafin um miskabætur vegna ummæla sinna.Karlmennskan

Ef marka má yfirlýsingar Haralds Þorleifssonar frumkvöðuls þarf þessi hópur fólks ekki að hafa áhyggjur af fjárhagslegu tjóni vegna kröfubréfa Ingós, enda hefur Haraldur sagst ætla að greiða lögfræðikostnaðinn eins og hann leggur sig. Ætla má að miskabæturnar séu innifaldar í því tilboði.


Tengdar fréttir

Borgar allan lögfræðikostnað fyrir þá sem Ingó lögsækir

Haraldur Þorleifsson, frumkvöðull sem hagnaðist verulega á sölu fyrirtækis síns til Twitter, hefur boðist til þess að greiða allan lögfræðikostnað þeirra sem Ingólfur Þórarinsson Veðurguð kann að lögsækja vegna ummæla á netinu um framkomu hans við konur.

Ingó Veðurguð fer í hart með hjálp Villa Vill

Vilhjálmur H. Vilhjálmsson ætlar fyrir hönd Ingólfs Þórarinssonar Veðurguðs að kæra nafnlausar sögur sem birtar hafa verið um söngvarann á netinu. Kröfubréf verða send vegna ummæla sem fallið hafa á netinu undanfarnar vikur.

Af­­bókaður víðast hvar og tekju­tapið er veru­­legt

Búið er að af­bóka Ingólf Þórarins­son, eða Ingó veður­guð, af fjölda gigga síðan hópurinn Öfgar birti yfir tuttugu nafn­lausar sögur kvenna sem lýsa kyn­ferðis­legu of­beldi af hálfu Ingós. Einnig er búið að af­lýsa þriðju seríu þáttanna Í kvöld er gigg. Ingó segist hafa orðið fyrir miklu tekju­tapi síðustu vikurnar.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.