Lífið

Lang­tíma­skortur á geð­læknum og bið eftir greiningu meira en þrjú ár

Hallgerður Kolbrún E. Jónsdóttir skrifar
Vilhjálmur Hjálmarsson, formaður ADHD samtakanna.
Vilhjálmur Hjálmarsson, formaður ADHD samtakanna. MISSION FRAMLEIÐSLA

„Ástandið í dag er alveg hrikalega slæmt. Það er langtímaskortur á geðlæknum og biðin hjá ADHD-teymi Landspítalans er komin yfir þrjú ár,“ segir Vilhjálmur Hjálmarsson, formaður ADHD samtakanna, í viðtali í þættinum Spjallið með Góðvild, sem birtist á Vísi í dag.

Vilhjálmur segir langtímaskort á geðlæknum og vanþekkingu á ADHD lengi hafa verið þungur baggi fyrir samfélagið. Vilhjálmur var sjálfur 33 ára gamall þegar hann var greindur með ADHD en hafði fundið lengi fyrir einkennum þess.

„Mig reyndar grunar að teymið sé eiginlega óvinnufært. Báðir geðlæknarnir sem voru þarna í hlutastarfi eru komnir annað, þeir eru komnir inn í geðteymin hjá heilsugæslunni og þeim teymum er ekki ætlað að greina nema það sé partur af stærra máli,“ segir Vilhjálmur.

Hann segir sárvanta geðlækna á landið og sálfræðinga sem eru menntaðir í klínískum ADHD-greiningum. Vandamálið sé ekki aðeins til staðar hjá fullorðnum einstaklingum sem bíði eftir greiningu heldur einnig hjá börnum. Hann vill að skólar taki meiri þátt í að koma til móts við börn sem eigi erfitt uppdráttar og grunur er um að séu með ADHD.

„Það er kannski tveggja ára bið fyrir barn sem er gríðarlega langur tími. Það þýðir það ekki að skólinn og foreldrarnir geti ekki gert eitthvað. Skólinn á að gera eitthvað á þess forsendum. Það á ekki að þurfa að bíða eftir formlegu greiningunni til þess að sjá, vita og reyna að gera ýmislegt. Enda er það hlutverk skólans að veita þjónustu af þessu tagi,“ segir Vilhjálmur.

Þættirnir Spjallið með Góðvild eru sýndir á Vísi Sjónvarp en einnig er hægt að hlusta á flestum hlaðvarpsstöðvum.

Verkefnið er afurð margra ára samstarfs Sigurðar Hólmars Jóhannessonar framkvæmdastjóra Góðvildar og Ágústu Fanneyjar Snorradóttur kvikmyndagerðarkonu og eiganda Mission Framleiðslu.

Þættirnir eru nýr vettvangur til að koma málefnum langveikra og fatlaðra barna á framfæri og auka í leiðinni sýnileika fyrir mikilvæg málefni. Hægt er að hafa samband við Sigurð og Ágústu Fanney vegna þáttanna í gegnum vefsíðuna godvild.is eða samfélagsmiðla félagsins. Með því að styrkja Góðvild þá ertu að styðja við langveik og fötluð börn á Íslandi. Styrktarreikningur 0301-26-660117, kennitala 6601172020.


Tengdar fréttir

„Þakklát fyrir að hafa fengið að vera áfram til“

Ingamaría Eyjólfsdóttir fer með eitt af aðalhlutverkunum í íslensku kvikmyndinni Skuggahverfið eða Shadowtown. Í janúar árið 2019 var hún þungt haldin á sjúkrahúsi í Danmörku eftir alvarlegt umferðarslys. Hún segist hafa lært margt af þeirri lífsreynslu og tekur engu sem sjálfsögðu.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.