Erlent

Zuma gefur sig fram og hefur af­plánun

Atli Ísleifsson skrifar
Nokkur fjöldi stuðningsmanna Zuma hafði safnast saman fyrir utan höll hans síðasta sunnudag og reyndu að koma í veg fyrir að hann yrði handtekinn.
Nokkur fjöldi stuðningsmanna Zuma hafði safnast saman fyrir utan höll hans síðasta sunnudag og reyndu að koma í veg fyrir að hann yrði handtekinn. EPA

Fyrrverandi forseti Suður-Afríku, Jacob Zuma, hefur gefið sig fram við lögreglu og hafið afplánun eftir að hafa verið dæmdur í fimmtán mánaða fangelsi á dögunum.

Hæstiréttur Suður-Afríku dæmdi Zuma fyrir að hafa sýnt dómstól óvirðingu þegar hann neitaði að mæta fyrir dómara í tengslum við spillingarrannsókn sem beindist að honum þegar hann gegndi embætti forseta.

Zuma mun afplána dóm sinn í Estcourt-fangelsinu í KwaZulu-Natal, heimahéraði Zuma.

BBC segir frá því að lögregla hafi varað hinn 79 ára Zuma við að hún væri reiðubúin að handtaka Zuma, myndi hann ekki gefa sig sjálfur fram við lögreglu fyrir miðnætti.

Zuma er fyrsti maðurinn til að hafa gegnt forsetaembættinu í landinu sem þarf að afplána fangelsisdóm eftir að hafa látið af embætti.

Nokkur fjöldi stuðningsmanna Zuma hafði safnast saman fyrir utan höll hans síðasta sunnudag og reyndu að koma í veg fyrir að hann yrði handtekinn.

Forsetatíð Zuma, sem stóð frá 2009 til 2018, einkenndist af ítrekuðum ásökunum um spillingu. Voru þungavigtarmenn í viðskiptalífi landsins sakaðir um að hafa mútað stjórnmálamönnum og þannig hafa áhrif á stefnumótun stjórnvalda.


Tengdar fréttir



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×