Erlent

Grænlenskar stúlkur létu riffilskotin vaða

Kristján Már Unnarsson skrifar
Frá Ilulissat, sem er stærsti bærinn við Diskó-flóa. Þorpið Ikamiut er fyrir sunnan Ilulissat.
Frá Ilulissat, sem er stærsti bærinn við Diskó-flóa. Þorpið Ikamiut er fyrir sunnan Ilulissat. Stöð 2/Egill Aðalsteinsson.

Uppnám varð í þorpinu Ikamiut á vesturströnd Grænlands í dag þegar þrjár stúlkur á stolnum báti tóku upp á því að skjóta á þorpið af bátnum utan við höfnina. Íbúar voru beðnir um að halda sig frá hafnarsvæðinu meðan beðið væri aðstoðar lögreglu.

Það var laust fyrir hádegi í dag sem lögreglu barst tilkynning um að verið væri að skjóta á þorpið, að því fram kemur í fréttum grænlensku fjölmiðlanna Sermitsiaq og KNR, en báðir vitna til fréttatilkynningar grænlensku lögreglunnar. Tæplega eitthundrað manns búa í þorpinu Ikamiut, sem er við sunnanverðan Diskó-flóa.

Áður hafði verið tilkynnt um að þrjár ungar konur hefðu stolið litlum báti. Þegar fulltrúi yfirvalda í þorpinu hugðist leysa málið og framkvæma borgaralega handtöku svöruðu stúlkurnar með því að skjóta af rifflum og sigla lengra frá landi.

Lögreglan tilkynnti svo um miðjan dag að tekist hefði að handsama stúlkurnar og afvopna þær. Tókst aðgerðin friðsamlega og án þess að nokkur slasaðist, rifflar voru teknir af þeim og hættuástandi aflýst í þorpinu. Lögreglan vildi að öðru leyti litlar upplýsingar veita um málið, þannig var ekkert nánar gefið upp um aldur stúlknanna.

Grænland

Tengdar fréttir

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið