Innlent

Alveg galin hugmynd að fara að banna Hopp um helgar vegna fyllerís

Snorri Másson skrifar
Sæ­unn Ósk Unn­steins­dótt­ir, fram­kvæmda­stjóri Hopp.
Sæ­unn Ósk Unn­steins­dótt­ir, fram­kvæmda­stjóri Hopp. Vísir/Vilhelm

Framkvæmdastjóri Hopp, stærsta rafskútufyrirtækis á landinu, telur „alveg galið“ að fara að banna rafskútur um helgar til þess að forðast slys vegna ölvunar. Sú hugmynd var sett fram í nýrri skýrslu um umferðaröryggi sem unnin var fyrir Reykjavíkurborg.

Þar segir: „Rafskútuleigur gætu mögulega aukið öryggi notenda sinna með því að loka á þjónustu sína á föstudags- og laugardagskvöldum, ef reynslan bendir til að notendur séu að leigja rafskútur undir áhrifum áfengis.“

Enda þótt reynslan bendi sannarlega til þess arna, að notendur séu að leigja rafskúturnar undir áhrifum, telur framkvæmdastjórinn helgarbann ekki leiðina út úr þeim vanda.

„Ég held að fólk þurfi fyrst og fremst að taka ábyrgð á sjálfu sér og ekki setjast upp á stýri þegar það er haugölvað. Það er auðvitað lykilatriðið í þessu öllu saman,“ segir Sæunn Ósk Unnsteinsdóttir framkvæmdastjóri.

Illframkvæmanlegt bann

Það er ekki svo að fyrir liggi að bann á Hoppi um helgar sé vilji borgaryfirvalda, heldur var þessi möguleiki aðeins reifaður í nokkuð umfangsmikilli skýrslu. 

Aðstoðaryfirlögregluþjónn í umferðardeild Lögreglunnar á höfuðborgarsvæðinu hefur þó lýst yfir ánægju með hugmyndina, enda minnki hún líkurnar á ölvunarakstri.

Sæunn segir Hopp orðinn það mikilvægan ferðamáta að það gangi illa upp að ætla að banna hann um helgar aðeins af því að fólk geti ekki passað sig.

„Jafnvel þótt leigurnar yrðu bannaðar, hvað á þá að gera við allar einkaskúturnar? Og reiðhjól? Þetta er alveg galið og óframkvæmanlegt,“ segir Sæunn.

Í skilmálum Hopp kemur fram að ekki sé leyfilegt að aka skútunum undir áhrifum og Sæunn segir að hver og einn verði að meta sitt ástand áður en farið er um borð. 

Sæunn kveðst ekki vilja draga úr alvarleika þeirra slysa sem hafa orðið, heldur taki fyrirtækið þeim mjög alvarlega. Tölfræðin sýni þó að af 5.000 innkomum á bráðamóttökuna í fyrra hafi 149 tilvik tengst rafskútum. Hún kallar þá eftir því að samanburður sé gefinn út á þeim slysum við aðrar gerðir slysa.

Gáleysi almennt á nóttinni

Í umræddri skýrslu, sem VSÓ og Vegagerðin komu að, er fjallað um að flest slysin verði á föstudags- og laugardagskvöldum.

Verið er að vinna að rannsókn á rafskútuslysum í Svíþjóð en fyrstu niðurstöður benda til að flest slysin verði á föstudags- og laugardagskvöldum, og á laugardagskvöldum verða einnig alvarlegustu slysin.

Þá hafa þrjú af fjórum banaslysum, sem vitað er um að hafi orðið á rafskútum sem eru leigðar af hjólaleigum í Bandaríkjunum, orðið milli kl. 1 og 5 að nóttu. Það má því áætla að meira gáleysi sé almennt meðal notenda rafskúta á kvöldin og um nætur og líklegt er að neysla áfengis og vímuefna sé einnig meiri á þeim tíma. Þá má einnig áætla að léleg birtuskilyrði og myrkur auki slysahættu.


Tengdar fréttir

Hopp vill leigja út bíla

Hopp endurnýjaði allan flota sinn á höfuðborgarsvæðinu á dögunum með nýjustu kynslóð af rafskútum og undirstrikaði þar með yfirburði sína á íslenska rafskútumarkaðnum. Flotinn stækkaði um leið úr 300 í 1.100 hjól.

Slys á hverjum degi á rafhlaupahjóli síðasta sumar

Síðasta sumar leitaði að meðaltali 1,6 á bráðamóttökuna vegna slysa á rafhlaupahjólum á degi hverjum, sem samsvarar um ellefu á viku. Margir sem slösuðust voru undir áhrifum áfengis eða vímuefna.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.