Skipti and­liti for­setans út og þóttist vera Ugla

Viðkomandi hafði notað myndvinnsluforritið Photoshop til þess að breyta mynd, sem upprunalega er af Uglu Stefaníu og Guðna Th. Jóhannessyni, og skipt andliti Guðna út fyrir andlit af öðrum óþekktum, amerískum karlmanni.

Þessi óprúttni aðili setti sig síðan í samband við kærustu karlmannsins og kvaðst vera Ugla. Þá tilkynnti „hin meinta Ugla“ kærustunni að hún væri að eiga í ástarsambandi við kærastann hennar. 

Viðkomandi gekk svo langt að nota raddbreyti til þess að líkja eftir rödd Uglu og bjó til aðgang á stefnumótaforritinu Grindr og setti á svið samtal á milli Uglu og kærastans.

Á endanum fékk kærastan „hina meintu Ugla“ til þess að játa að þetta væri allt saman lygi. Eitthvað hefur tekist illa að sannfæra kærustuna, því hún setti sig í samband við „hina raunverulegu Uglu“ og sakaði hana um að standa á bak við þetta allt saman.

Þrátt fyrir játningu svikahrappsins þar sem hann sýndi kærustunni upprunalegu myndina og þá staðreynd að Ugla sjálf búi í annarri heimsálfu en parið sem um ræðir, var kærastan ekki enn sannfærð.

Ugla segir það athyglisverðasta við þetta mál vera myndaval svikahrappsins. En að hennar eigin sögn var um að ræða mynd af henni sem var ekki sérlega tilkomumikil.

Það hefur borið sérstaklega mikið á því undanfarið að óprúttnir aðilar stofni aðganga á hinum ýmsu samfélagsmiðlum til dæmis Instagram, sem þekktir einstaklingar eða fyrirtæki og reyni að fylgja sem flestum. Áhrifavaldar og fyrirtæki hafa reglulega varað við þessu.

Af stöðuuppfærslu Uglu að dæma, virðist hún þó hafa haft nokkuð gaman af uppátækinu. „Það verður erfitt að toppa þetta,“ segir Ugla.