Hafa sent þúsundir aftur til Marokkó

Samúel Karl Ólason skrifar 21. maí 2021 10:15

Lögregluþjónar standa nærri líki manns sem rak á land í Ceuta. Maðurinn hafði reynt að synda frá Marokkó til yfirráðasvæðis Spánar. EPA/BRAIS LORENZO

Rúmlega 6.500 af þeim um átta þúsund farand- og flóttamönnum sem hafa gert sér leið til Ceuta, yfirráðasvæðis Spánar í Norður-Afríku, í þessari viku hafa verið sendir aftur til Marokkó. Þetta tilkynnti Fernando Grande-Marlaska, innanríkisráðherra Spánar í morgun.

Hann sagði að fólk væri ekki lengur að reyna að komast til Ceuta, hins vegar hafi hundruð reynt að komast til Melilla, annars yfirráðasvæðis Spánar í Norður-Afríku. Minnst þrjátíu eru sagðir hafa komist þar yfir landamærin.

Spánn og Marokkó eiga í deilum þessa dagana og hafa Spánverjar leitt líkur að því að landamærum í Marokkó hafi verið skipað að hleypa fólki að landamærum Ceuta til að refsa Spánverjum fyrir að taka á móti Brahim Ghali. Sá leiðir sjálfstæðishreyfingu í vesturhluta Marokkó en hefur verið á sjúkrahúsi á Spáni frá því í síðasta mánuði.

Sjá einnig: Hermenn sendir til að hefta flæði fólks yfir landamærin í Ceuta

EL País segir forsvarsmenn Evrópusambandsins hafa sent yfirvöld í Marokkó skilaboð um að slakt landamæraeftirlit þar gæti leitt til samdráttar í fjárhagsaðstoð sambandsins. Ráðamenn í Marokkó hafi nýverið heitið því að draga úr flæði flótta- og farandfólks.

AP fréttaveitan segir flesta sem hafa reynt að komast til Ceuta vera unga menn frá Marokkó. Blaðamenn fréttaveitunnar ræddu við nokkra þeirra sem segjast lepja dauðan úr skel í Marokkó. Enga vinnu væri að fá og margir þeirra sem hafi reynt að komast til Ceuta búi á götunni.

Einn viðmælandi lýsti því að vera fastur í Marokkó við það að vera dauður. Þeir hefðu engu að tapa við að reyna að komast til Evrópu.

„Við munum halda áfram að reyna. Við munum finna leið, jafnvel þó hafið frjósi,“ sagði annar.

Spánn Marokkó Flóttamenn Evrópusambandið

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.