Íslenski boltinn

Föðmuðu mótherja eftir að hafa jafnað á Selfossi

Ingvi Þór Sæmundsson skrifar
Emma Checker vissi ekki hvað á hana stóð veðrið þegar Stjörnukonur föðmuðu hana eftir að hafa jafnað í 1-1.
Emma Checker vissi ekki hvað á hana stóð veðrið þegar Stjörnukonur föðmuðu hana eftir að hafa jafnað í 1-1. stöð 2 sport

Skondið atvik var í leik Selfoss og Stjörnunnar í Pepsi Max-deild kvenna á laugardaginn.

Selfyssingar komust yfir með marki Önnu Maríu Friðgeirsdóttur á 32. mínútu og staðan var 1-0 í hálfleik.

Á 52. mínútu jafnaði nýsjálenska landsliðskonan Betsy Hassett þegar hún rak smiðshöggið á laglega sókn.

Betsy fagnaði með samherjum sínum og Emmu Checker, leikmanni Selfoss, sem lenti óvænt í faðmlögum við glaðar Stjörnukonur. Henni var ekki skemmt og losaði sig frá Garðbæingum.

Markið og atvikið má sjá í spilaranum hér fyrir neðan, á 03:20.

Skömmu eftir að hafa lent í fagnaðarlátum Stjörnukvenna fékk Emma gult spjald fyrir mótmæli eftir að hafa ekki fengið vítaspyrnu sem hún vildi fá.

Emma gat þó leyft sér að brosa í leikslok því Selfoss vann 3-1 sigur. Unnur Dóra Bergsdóttir og Hólmfríður Magnúsdóttir skoruðu tvö mörk með þriggja mínútna millibili eftir rúman klukkutíma.

Selfoss er með fullt hús stiga og markatöluna 8-1 á toppi Pepsi Max-deildarinnar. Næsti leikur liðsins er gegn Þrótti í Laugardalnum á miðvikudaginn.


Pepsi Max deild kvenna er á Stöð 2 Sport en upplýsingar um útsendingar má finna hér. Pepsi Max deildin er hluti af Stöð 2 Sport Ísland sem kostar 3.990 krónur á mánuði en einnig má kaupa útsendingar sem stakan viðburð á 990 krónur.




Fleiri fréttir

Sjá meira


×