Innlent

Stíga fast til jarðar í Skagafirði: Loka skólum, líkamsræktarstöðvum og sundlaugum

Elísabet Inga Sigurðardóttir og Vésteinn Örn Pétursson skrifa
Fjöldi fólks lagði leið sína að Heilbrigðisstofnun Norðurlands vestra í dag í sýnatöku.
Fjöldi fólks lagði leið sína að Heilbrigðisstofnun Norðurlands vestra í dag í sýnatöku. AÐSEND

Ráðist verður í víðtækar aðgerðir til að stemma stigu við útbreiðslu kórónuveirunnar í Skagafirði. Sex hafa greinst með kórónuveiruna á svæðinu á síðustu þremur dögum og eru um 300 manns í sóttkví.

Skólahaldi verður aflýst í viku og leikskólanum lokað, með undantekningu fyrir börn þeirra sem eru í forgangshópi. Þá verður lokaprófum fjölbrautaskóla Norðurlands vestra breytt í fjarpróf, auk þess sem verið er að rýma heimavist skólans eins og kostur er.

Sundlaugum og líkamsræktarstöðvum verður lokað og íþróttaæfingar barna og íþróttaleikir verða óheimilaðir. Skíðasvæðinu og ráðhúsinu verður einnig lokað, auk þess sem menningarviðburðum verður aflýst, sem og fundum sveitarstjórnar.

Þá hafa fyrirtæki á svæðinu gripið til aðgerða með því að lengja opnunartíma með það fyrir augum að dreifa álaginu og fækka þeim sem eru inni í verslunum og annars staðar á sama tíma. Margar þjónustustofnanir hafa þá sent starfsfólk í heimavinnu.

„Það er von okkar að með þessum aðgerðum munum við ná hratt utan um þessa hópsýkingu,“ segir Stefán Vagn Stefánsson, yfirlögregluþjónn á Norðurlandi vestra.

Hann segir að aðgerðirnar gildi flestar til 17. maí. Staðan verði endurmetin næstu helgi og næstu skref ákveðin. Afléttingar samkomutakmarkana sem taka gildi á miðnætti munu ekki taka gildi í Skagafirði og Akrahreppi, vegna stöðunnar sem upp er komin.

Eins og stendur eru um 300 manns í sóttkví á Sauðárkróki og í nærsveitum.

Almannavarnardeild ríkislögreglustjóra fundaði um stöðuna í Skagafirði klukkan 14 í dag þar sem ákvörðun um takmarkanir var tekin.

Hér að neðan má sjá tilkynningu frá lögreglu þar sem umfang takmarkananna er útlistað nákvæmlega.

Tilkynning frá aðgerðastjórn almannavarna á Norðurlandi vestra Aðgerðastjórn almannavarna á Norðurlandi vestra hefur...

Posted by Lögreglan á Norðurlandi vestra on Sunday, 9 May 2021

Stíga mjög þungt til jarðar

Stefán Vagn sagði í samtali við fréttastofu að ákveðið hefði verið að stíga mjög þungt til jarðar til að mæta stöðunni.

Staðfest er nú að sex manns séu smitaðir af kórónuveirunni á Sauðárkróki og í Skagafirði og segir sveitarstjórinn þar að búast megi við því að fleiri greinist smitaðir á næstu dögum. 

Löng biðröð fólks á leið í sýnatöku var fyrir utan Heilbrigðisstofnun Norðurlands vestra á Sauðárkróki í morgun.

Nemandi í Árskóla smitaður

Einn hinna smituðu er nemandi í níunda bekk í grunnskólanum á Sauðárkróki og eru bekkjarfélagar hans  og kennarar komnir í sóttkví. Nemandinn mætti í skólann í síðustu viku og býst skólastjórinn, Óskar G. Björnsson við því að allir þeir 32 nemendur sem eru í níunda bekk í skólanum fari í sóttkví auk tíu kennara.

Sigfús Ingi Sigfússon, sveitarstjóri Skagafjarðar sagði í samtali við fréttastofu í dag og í gær að smitin væru þess eðlis að viðbúið væri að veiran væri búin að dreifa sér.


Tengdar fréttir

Geta búist við fleiri smitum fyrir norðan

Staðfest er nú að sex manns séu smitaðir af kórónuveirunni á Sauðárkróki og í Skagafirði og segir sveitarstjórinn þar að búast megi við því að fleiri greinist smitaðir á næstu dögum. Þá er viðbúið að fólki í sóttkví fjölgi talsvert mikið í dag.

Tveir smitaðir fyrir norðan og einn í sóttkví

Tvö ný kórónuveirusmit hafa verið staðfest hér á landi síðasta sólarhringinn en annar einstaklinganna var í sóttkví samkvæmt upplýsingum almannavarna. Bæði smitin greindust í Skagafirði. Enginn greindist smitaður á landamærunum þrátt fyrir metfjöldi flugvéla hafi komið til landsins frá því að faraldurinn hófst.

Gætu gripið til þess að loka skólum

Hátt í 200 Skagfirðingar voru skimaðir fyrir kórónuveirunni í dag eftir að fjórir greindust með veiruna á svæðinu. Lögregla biðlar til fólks að halda sig til hlés en óvíst er með skólahald í næstu viku.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.