Sjálf­stæðis­menn skamma Mörtu: „Alltaf gamla nornin sem tapar“

Meðal þeirra sem tjáð sig hafa um ummæli Mörtu er Hildur Björnsdóttir, flokkssystir hennar í borgarstjórnarflokki Sjálfstæðisflokksins. „Svívirðingar og uppnefni í opinberri umræðu eru ekki til þess fallin að auka traust og tiltrú á stjórnmálin. Ég hugsa að Sjálfstæðismenn vilji almennt temja sér háttvísi í rökræðulistinni og sanngirni í umræðunni. Vonandi felur framtíð stjórnmálanna í sér uppbyggileg skoðanaskipti og almenna kurteisi í lifandi samkeppni hugmyndanna,“ skrifar Hildur. Ætla má að þar sé hún að vísa til ummæla Mörtu.

Meðal þeirra sem deilt hafa færslu Hildar er Katrín Atladóttir sem einnig er borgarfulltrúi Sjálfstæðisflokksins. Ekki eru það aðeins borgarfulltrúar Sjálfstæðisflokksins sem hnýta í Mörtu en það gerir Pawel Bartoszek, borgarfullrúi Viðreisnar og forseti borgarstjórnar til að mynda einnig þar sem hann gefur í skin að orðalagið í grein Mörtu sé á lágu plani.

Þorbjörg Helga Vigfúsdóttir, fyrrverandi borgarfulltrúi Sjálfstæðisflokksins er jafnframt harðorð í garð Mörtu. „Ég vann með bæði Mörtu og Gísla í mörg ár í borginni. Flokkurinn var klofinn þá um uppbyggilega og fallega þróun borgar. Hann er enn klofinn í herðar niður. Þessi grein dæmir Sjálfstæðismenn úr leik,“ skrifar Þorbjörg um leið og hún hvetur Gísla Martein til dáða.

Almannatengillinn Friðjón Friðjónson slær á létta strengi á Twitter með því að minna á að „í öllum prinsessusögunum þá er það alltaf gamla nornin sem tapar.“ Meðal þeirra sem hafa deilt færslu Friðjóns áfram eru Gísli Marteinn sjálfur auk Rafns Steingrímssonar og Nönnu Kristínu Tryggvadóttur sem bæði hafa tekið virkan þátt í starfi Sambands ungra sjálfstæðismanna og hafa gegnt trúnaðarstörfum fyrir flokkinn.

Magnús Sigurbjörnsson, fyrrverandi framkvæmdastjóri borgarstjórnarflokks Sjálfstæðisflokksins, segist vera orðlaus yfir grein Mörtu. „Svona rætin orðræða á ekki að þrífast og er pólitíkinni ekki til sóma,“ skrifar Magnús meðal annars á Twitter.

Áslaugu Huldu Jónsdóttur, Sjálfstæðiskonu og formanni bæjarráðs Garðabæjar, finnast ummæli flokkssystur sinnar ekki heldur vera til sóma. Marta hljóti að hafa ruglast. „Við getum verið ósammála og það er hollt að takast á en gerum það málefnalega og sýnum virðingu. Það stækkar enginn með því að reyna að smækka aðra,“ skrifar Áslaug á Facebook.

Sigurður Kári Kristjánsson, fyrrverandi þingmaður flokksins, tjáir sig einnig um málið og segir Mörtu ganga allt of langt. „Þegar ég les þennan pistil sem Marta Guðjónsdóttir hefur nú skrifað velti ég því fyrir mér hvort ástæðan fyrir því að fulltrúar míns flokks í borgarstjórn ná ekki betri árangri en raun ber vitni sé framkoma af þessu tagi gagnvart þeim sem eru þeim ósammála,“ skrifar Sigurður Kári.