Erlent

Lögreglukonan sem skaut Wright ákærð fyrir manndráp

Samúel Karl Ólason skrifar
Umfangsmikil mótmæli hafa átt sér stað í kjölfar dauða Wright.
Umfangsmikil mótmæli hafa átt sér stað í kjölfar dauða Wright. AP/John Minchillo

Lögreglukonan sem skaut Daunte Wright til bana eftir að hann var stöðvaður fyrir umfarðalagabrot verður ákærð fyrir manndráp. Hin 48 ára gamla Kimberly A. Potter, sem hafði starfað hjá lögreglunni í Brooklyn Center í Minnesota, segist hafa skotið Wright fyrir mistök er hann reyndi að komast á brott.

Potter verður ákærður fyrir manndráp af annarri gráðu og gæti hún verið dæmd til allt að tíu ára fangelsisvistar, samkvæmt AP fréttaveitunni.

Hún segist hafa ætlað að skjóta hann með rafbyssu en hún hafi fyrir mistök tekið skammbyssu sína upp.

Daunte Wright var tuttugu ára gamall svartur maður sem var stöðvaður á bíl sínum á sunnudaginn fyrir að vera á óskoðuðum bíl. Þá kom í ljós að búið var að gefa út handtökuskipun gegn Wright fyrir að hafa ekki mætti fyrir dómara og reyndi hann að komast undan þegar verið var að handtaka hann.

Myndefni úr vestismyndavél Potter sýnir að hún tók upp byssu sína og hótaði að gefa Wright rafstuð. Hún hleypti svo af skoti í þann mund sem Wright keyrði á brott og virtist hún hissa á því að hafa skotið hann.

Fjölskylda Wright segir ótækt að afsaka atvikið með því að um mistök hafi verið að ræða. Þetta sé enn eitt dæmið um það óréttlæti sem svartir Bandaríkjamenn verði fyrir frá réttarkerfi landsins. Wright hafi verið stöðvaður fyrir að vera á óskoðuðum bíl og hafi dáið fyrir vikið.

Tilkynnt var í gær að Potter væri hætt í lögreglunni og sömuleiðis sagði lögreglustjóri Tim Gannon af sér.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.