Innlent

Heim­skauta­loft af köldustu sort steypist yfir landann

Sylvía Hall skrifar
Eftir milt veður undanfarna daga þurfa landsmenn nú að klæða sig örlítið betur.
Eftir milt veður undanfarna daga þurfa landsmenn nú að klæða sig örlítið betur. Vísir/Vilhelm

Það kólnaði verulega í veðri á landinu öllu í gærkvöldi og í nótt og var algengt að hiti á mælum félli um tíu stig á þessum tíma. Þetta kemur fram í hugleiðingum veðurfræðings hjá Veðurstofu Íslands en nú mælist frost á landinu öllu og algengast að það sé á bilinu fimm til tíu stig.

Ástæða kólnandi veðurs er heimskautaloft af köldustu sort sem „nú steypist yfir okkur“ að sögn veðurfræðings, en undanfarna daga hefur milt loft af suðrænum uppruna leikið um landið. Umskiptin eru með skarpasta móti og má búast við norðan stormi eða roki á austanverðu landinu eftir hádegi. Vestantil verður strekkingsvindur og má búast við éljum víða, þó þurrt sunnanlands síðdegis.

Íslendingar eru þó ekki einir um það að finna fyrir kalda veðrinu, en mikill og breiður norðan vindstrengur er á milli Íslands og Noregs. Má því vænta þess að fréttir berist af kulda frá fleiri landsvæðum á næstunni, t.d. Bretlandi, sunnanverðri Skandinavíu og á norðanverðu meginlandi Evrópu.

Veðurhorfur á landinu næstu daga

Á þriðjudag:

Hæg breytileg átt og léttskýjað, en norðan 8-13 og lítilsháttar él með austurströndinni. Frostlaust með suðurströndinni en annars allt að 10 stiga frost.

Á miðvikudag:

Breytileg átt 5-13, en norðaustan 10-18 undir kvöld. Snjókoma víða um land og frost 1 til 7 stig, en slydda við suðvesturströndina og hiti rétt yfir frostmarki.

Á fimmtudag:

Minnkandi norðanátt og él norðanlands framan af degi, en þurrt og bjart sunnan heiða. Frost 3 til 10 stig.

Á föstudag:

Vestlæg átt, 5-13 m/s. Snjókoma eða slydda vestan- og norðanlands. Frostlaust vestast en annars frost 0 til 8 stig.

Á laugardag:

Útlit fyrir austanátt og slyddu suðvestanlands en annars úrkomulítið og frost 2 til 10 stig.

Á sunnudag:

Norðaustan 5-10 og él í flestum landshlutum. Frost 0 til 10 stig, minnst við suðurströndina.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.